«Ուժեղ Հայաստան»-ի պատգամավորի թեկնածուներից 2-ը կալանավորվել են, 4-ի նկատմամբ հայտարարվել է հետախուզում

ՀՀ քննչական կոմիտեի հատկապես կարևոր գործերի քննության գլխավոր վարչության ընդհանուր բնույթի և ընտրական հանցագործությունների քննության վարչությունում քննվող քրեական վարույթի շրջանակում «Ուժեղ Հայաստան» կուսակցության պատգամավորի թեկնածուներից 6-ի նկատմամբ հարուցվել է հանրային քրեական հետապնդում, այս մասին հայտնում է ՀՀ Քննչական կոմիտեն։

Քրեական գործը վերաբերում է բազմաթիվ անձանց նյութապես շահագրգռելու և առանձնապես խոշոր չափերով փողերի լվացման ենթադրյալ դեպքերին։ Ըստ Քննչական կոմիտեի՝ նշված անձինք մեղադրվում են ՀՀ քրեական օրենսգրքի 46-236-րդ հոդվածի 2-րդ մասով և 296-րդ հոդվածի 3-րդ մասի 3-րդ կետով նախատեսված արարքների համար։

Նախաքննության ընթացքում մեղադրյալներից երկուսի նկատմամբ որպես խափանման միջոց կիրառվել է կալանքը։ Մյուս չորս անձանց նկատմամբ ևս կայացվել է կալանավորման որոշում, սակայն նրանք չեն ներկայացել վարույթն իրականացնող մարմնին, ինչի հետևանքով հայտարարվել են հետախուզում։

Նախաքննությունը շարունակվում է։