Փաշինյանի հետ միջադեպից հետո՝ երեք անձի դեմ քրեական գործ

Քննչական կոմիտեն մեղադրանք է առաջադրել Սուրբ Աննա եկեղեցու միջադեպից հետո ձերբակալվածներին։ Խափանման միջոցի հարցը դեռևս լուծված չէ , հայտնել են Կոմիտեից։

Ըստ ՔԿ հաղորդագրության՝ Դավիթ Մինասյանի նկատմամբ հարուցվել է հանրային քրեական հետապնդում՝ խուլիգանության և պաշտոնատար անձի օրինական ծառայողական կամ քաղաքական գործունեությանը միջամտելու հոդվածներով։ Միքայել Մինասյանի նկատմամբ մեղադրանք է առաջադրվել խուլիգանությանն աջակցելու և պաշտոնատար անձի օրինական ծառայողական կամ քաղաքական գործունեությանը միջամտելուն աջակցելու հոդվածներով, իսկ Գևորգ Գևորգյանի նկատմամբ՝ խուլիգանությունը կազմակերպելու և պաշտոնատար անձի օրինական ծառայողական կամ քաղաքական գործունեությանը միջամտելը կազմակերպելու հոդվածներով։

Նրանք ձերբակալվել էին նախորդ օրը։

Դեպքը տեղի է ունեցել կիրակի օրը՝ Սուրբ Աննա եկեղեցում։ Երբ վարչապետ Նիկոլ Փաշինյանը անվտանգության աշխատակիցների և այլ պաշտոնյաների ուղեկցությամբ փորձում էր դուրս գալ եկեղեցուց՝ պատարագը դեռ չավարտված, անվտանգության աշխատակիցները սկսեցին ճանապարհ բացել։

Այդ ընթացքում ամբոխից մի երիտասարդ դժգոհել է՝ հորդորելով իրեն չհրել և նշել է, որ ցանկանում է մնալ իր տեղում։ «Տենց չնայես ինձ», — դիմել է նա վարչապետին, ինչից հետո փորձել է ձեռքով հարվածել։