Պետական դավաճանության և լրտեսության դեպքով քրեական վարույթ է նախաձեռնվել. թիրախում ԱԺ պատգամավոր է

Հայաստանի Հանրապետության քննչական կոմիտեում քրեական վարույթ է նախաձեռնվել պետական դավաճանության և լրտեսության առերևույթ դեպքի առթիվ։ Գործի հիմքում Ազգային անվտանգության ծառայությունից (ԱԱԾ) ստացված հաղորդումն է։

Ըստ իրավապահների տարածած տեղեկատվության՝ հանցավոր արարքի մեջ կասկածվում է ՀՀ քաղաքացի, քաղաքական գործիչ Ա.Թ.-ն: Վերջինս՝

• 2021 թվականի խորհրդարանական ընտրություններում աջակցել է «Հայաստան» կուսակցությունների դաշինքին,
• Ընդգրկված է եղել նույն դաշինքի համապետական ընտրական ցուցակում և հանդիսանում է ԱԺ պատգամավոր։

Նախնական տվյալներով՝ Ա.Թ.-ն 2024 թվականի ընթացքում հավաքագրվել է օտարերկրյա հատուկ ծառայությունների կողմից։ Նա գործել է «Ռուսսիա Կովկաս» աշխարհաքաղաքական կենտրոնի տնօրենի (ով հանդիսանում է օտարերկրյա հատուկ ծառայությունների ներկայացուցիչ) հանձնարարությամբ։

Պատգամավորն ապօրինի կերպով հավաքել և ռուսերեն է թարգմանել պետական գաղտնիք պարունակող տեղեկություններ: Դրանք վերաբերել են 2024 թվականի ապրիլին ԱԺ փակ, գաղտնի նիստում կայացած լսումների ընթացքին ու արդյունքներին։

Այս տեղեկությունները փոխանցելու դիմաց Ա.Թ.-ն ստացել է առանձնապես խոշոր չափերի՝ 622,000 ԱՄՆ դոլար գումար։ Ըստ իրավապահների՝ նա կատարել է պետական դավաճանություն՝ ի վնաս ՀՀ ինքնիշխանության, տարածքային անձեռնմխելիության և արտաքին անվտանգության:

ՀՀ քննչական կոմիտեի համապատասխան գլխավոր վարչությունում վարույթ է նախաձեռնվել ՀՀ քրեական օրենսգրքի հետևյալ հոդվածներով.

1. Հոդված 418, մաս 1 – Պետական դավաճանություն,
2. Հոդված 424, մաս 1 – Լրտեսություն։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով դատարանի օրինական ուժի մեջ մտած դատավճռով: