Պետականությունը միայն ժառանգություն չէ, այլ ամենօրյա պատասխանատվություն․ ՀՀ նախագահ

Մայիսի 28-ը մեր պատմության այն հանգրվաններից է, որը հիշեցնում է՝ պետականությունը միայն պատմական ժառանգություն չէ, այլև ամենօրյա պատասխանատվություն՝ պահանջող քաղաքական հասունություն, ազգային ինքնագիտակցություն և հանրային համերաշխություն, նշված է ՀՀ նախագահ Վահագն Խաչատուրյանի՝ Հանրապետության օրվա առիթով հղված ուղերձում։

«Այսօր ևս Հայաստանը կանգնած է բարդ և վճռորոշ մարտահրավերների առաջ։ Մեր ինքնիշխանության ամրապնդումը, պետական ինստիտուտների կայուն զարգացումն ու անվտանգ ապագայի կառուցումը պահանջում են հավաքական պատասխանատվություն և պետական մտածողություն։ Մեր պատմական փորձը վկայում է, որ հայ ժողովուրդը կարողացել է հաղթահարել ամենածանր փորձությունները, երբ առաջնորդվել է միասնականության, փոխադարձ հարգանքի և ազգային համախմբման սկզբունքներով»,- ասված է ուղերձում։

Նախագահի խոսքով՝ առաջիկա խորհրդարանական ընտրությունները կարևոր փորձություն են լինելու մեր ժողովրդավարության, պետական համակարգի կայունության և հանրային հասունության համար։

Շեշտում է՝ այս ընտրությունները պետք է դառնան ազատ կամարտահայտման, օրենքի գերակայության և քաղաքական մշակույթի ամրապնդման հերթական հաստատումը։

 

Նա մաղթել է՝ համերաշխության, պատասխանատվության և պետական մտածողության շնորհիվ կարողանանք հաղթահարել մեր առջև ծառացած բոլոր դժվարությունները և կառուցել անվտանգ, խաղաղ ու արժանապատիվ ապագա։