Ռումինիայի խորհրդարանի ստորին պալատը կողմ է քվեարկել Մոլդովայի հետ Ռումինիայի միավորմանը

Ռումինիայի խորհրդարանի ստորին պալատը՝ Պատգամավորների պալատը, կողմ է քվեարկել Ռումինիայի և Մոլդովայի միավորման վերաբերյալ «S.O.S. Romania» կուսակցության օրինագծին, գրում է romania-insider.com-ը։

Այս մասին նշված է այդ երկրի խորհրդարանի պաշտոնական կայքում։ Օրինագծի նկատմամբ, ինչպես նշվում է, գործարկվել է, այսպես կոչված, «լուռ ընդունման» գործընթացը, որը ենթադրում է, որ բոլոր այն նախաձեռնությունները, որոնք 45 օրվա ընթացքում չեն քննարկվել և չեն մերժվել խորհրդարանի լիագումար նիստի ժամանակ, ավտոմատ կերպով համարվում են ընդունված։

Ռումինիայում ներկայումս միավորման օգտին պատրաստ է քվեարկել բնակչության մոտ 72 տոկոսը:

Տարբեր գնահատականներով՝ Մոլդովայի մոտ 2,4 միլիոն քաղաքացիների ավելի քան մեկ երրորդը Ռումինիայի քաղաքացիություն ունի։