Ռուսական շուկայում մերժված հայկական ապրանքները կվաճառվեն ԵՄ-ում

 ՀՀ էկոնոմիկայի նախարար Գևորգ Պապոյանը հայտնել է, որ Ռուսաստանի կողմից հայկական բազմաթիվ ապրանքների ներմուծումը սահմանափակելու ֆոնին Հայաստանի էկոնոմիկայի նախարարությունը Կառավարության քննարկմանն է ներկայացրել աջակցության ծրագիր, որպեսզի հայ տնտեսվարողները կարողանան իրենց արտադրանքը դեպի Եվրամիության շուկա արտահանել։

Հարցին, թե որքանով են համատեղելի եվրապական ստանդարտները և հայկական ապրանքները, նախարար Պապոյանը պատասխանել է, որ հայկական արտահանելի պտուղ-բանջարեղենն ունի Global Gap սերտիֆիկատ, որն ամենաբարձր կարգի սերտիֆիկատներից մեկն է։Սակայն կան տրանսպորտային ծախսեր, որոնց հետ կապված փոխհատուցման ծրագիր է այսօր ներկայացվել Կառավարություն։

«Կսուբսիդավորենք մեր գյուղմթերք արտահանողներին, որպեսզի նրանք կարողանան մրցունակ գներ առաջարկել եվրոպական շուկային»,- ասել է նախարարը։

Նա շեշտել է, որ Կառավարությունն  աջակցության այդ  ծրագրով պատրաստվում է մեծ գումարներ ծախսել, որպեսզի տնտեսվարողները չտուժեն։

Հարցին, թե Եվրամիության որ երկրներ կկարողանան հայ տնտեսվարողներն ապրանք արտահանել, Պապոյանն ասել է.

«Բոլոր եվրոպական երկրներ՝ սկսած Հունաստանից վերջացրած Գերմանիայով»։