RISE Powered by Silicon Mountains 2026-ի շրջանակում քննարկվել են ռազմարդյունաբերության զարգացման հեռանկարները

Հունիսի 3-ին Կարեն Դեմիրճյանի անվան մարզահամերգային համալիրում մեկնարկած՝ Հայաստանում առաջին անգամ անցկացվող RISE Powered by Silicon Mountains 2026 երկօրյա բարձր տեխնոլոգիական ցուցահանդեսի և ֆորումի շրջանակում կայացել է «Ռազմարդյունաբերության զարգացումը Հայաստանում» թեմայով պանելային քննարկումը, որին մասնակցել է ՀՀ բարձր տեխնոլոգիական արդյունաբերության նախարար Մխիթար Հայրապետյանը, հայտնում են ԲՏԱՆ-ից:

Քննարկման ընթացքում նախարար Հայրապետյանն անդրադարձել է ռազմարդյունաբերության ոլորտում վերջին տարիների զարգացումներին, առկա մարտահրավերներին, պետական քաղաքականություններին, մարդկային կապիտալի ձևավորմանը։

Հայրապետյանը նշել է՝ ՀՀ-ի ռազմարդյունաբերությունը դեռևս ձևավորման փուլում է, սակայն արդեն դարձել է երկրի զարգացման կարևոր ուղղություններից մեկը՝ հատկապես վերջին հինգ տարիներին արձանագրելով համակարգային առաջընթաց։

«Մեր առաջնահերթությունը հայրենական արտադրության խթանումն է և պետության, մասնավոր հատվածի ու գիտական համայնքի ջանքերի համատեղումը՝ մրցունակ ռազմարդյունաբերական էկոհամակարգ ձևավորելու նպատակով»,-ասել է նախարարը։