Սահմանապահ զորքերը խաղաղության սիմվոլ են, որտեղ սահմանին կանգնած են սահմանապահներ, այդ սահմանին տիրում է խաղաղություն․ Փաշինյան

Ազգային անվտանգության ծառայության սահմանապահ զորքերի կազմավորման օրվա առթիվ կազմակերպված միջոցառմանը վարչապետ Փաշինյանը հանդես է եկել ելույթով։

Ելույթի ժամանակ վարչապետը նշել է, որ սահմանպահ զորքերի ծառայությունը ՀՀ–ում իրականցվում է մի բացառիկ իրավիճակում, երբ Հայաստանի Հանրապետության անկախությունից ի վեր՝  առաջին անգամ ՀՀ բոլոր սահմանային անցման կետերը վերահսկվում են և  ծառայությունն իրականացվում է ՀՀ սահմանապահ զորքերի կողմից։

 Փաշինյանը նշել է նաև․
«Ադրբեջանի հետ ունենք սահմանազատված և սահմանագծված 12 կմ–ոց սահմանային հատված, որտեղ ծառայություն են իրականացնում ՀՀ սահմանապահ զորքերը, սա կարևոր և բացառիկ իրավիճակ է, և պիտի արձանագրեմ որ այդ 12 կմ–ը ՀՀ–ի  և Ադրբեջանի Հանրապետության սահմանի միակ հատվածն է, որտեղ Հայաստանի և Ադրբեջանի զինված ուժերը ծառայություն են իրականցնում առանց սաղավարտների, առանց զրահաբաճկոնների, և ինքնաձիգների պահունակները, ոչ թե ինքնաձիգների վրա են, այլ պայուսակների մեջ դրած»:

Վարչապետը հավելել է, որ դա տեղի է ունեցել Հայաստանի և Ադրբեջանի սահմանապահ զորքերի, կառավարությունների միջև ձեռք բերված պայմանավորվածությամբ։

«Սահմանապահ զորքերը խաղաղության սիմվոլ են, որովհետև այնտեղ, որտեղ սահմանին կանգնած են սահմանապահներ, մեծ հավանականությամբ կամ դեպքերի մեծամասնությամբ այդ սահմանին տիրում է  խաղաղություն»,– ելույթի ժամանակ ասել է Փաշինյանը։

Ելույթի ժամանակ նա նաև նշել է, որ առաջիկայում կշարունակվի և ավարտին կհասցնվի   Հայաստանի  և Ադրբեջանի միջև սահմանի սահմանազատումը։