Սևանա լճի հատակի հնագիտական շերտերը կպաշտպանվեն. Հայաստանը միանում է ՅՈՒՆԵՍԿՕ-ի կոնվենցիային

Ազգային ժողովում քննարկվում է Կառավարության ներկայացրած՝ Ստորջրյա մշակութային ժառանգության պաշտպանության մասին ՅՈՒՆԵՍԿՕ-ի 2001 թվականի կոնվենցիան վավերացնելու մասին օրենքի նախագիծը:

Հիմնական զեկուցող, ԿԳՄՍ նախարար Ժաննա Անդրեասյանի խոսքով՝ այս նախագիծը լայն հնարավորություններ է ընձեռում անդրադառնալու մշակութային ժառանգության ևս մի կարևոր շերտի և միջազգային հարթակներում ներդնելու արդյունավետ գործիքակազմ։

Նախարարը հատկապես կարևորեց միջազգային համագործակցությունն ու մասնագիտական կարողությունների զարգացումը․

«Խնդրո առարկա կոնվենցիան ընդունվել է 2001 թվականին, ուժի մեջ մտել 2009-ին: Այս պահին ակնհայտ է, որ կոնվենցիային միանալը նոր հնարավորություններ է բացում երկրների համար, քանի որ դրա նպատակն է ապահովել և ամրապնդել ստորջրյա մշակութային ժառանգության պաշտպանությունը՝ գիտական հետազոտությունների, տեղեկատվության փոխանակման, կրթության և մասնագիտական կարողությունների զարգացման միջոցով»,- նշեց նախարարը:

Ոլորտի փորձագետների գնահատմամբ՝ Սևանա լճում և ՀՀ մի շարք այլ ջրային ավազաններում առկա են կոնվենցիայով պաշտպանության ենթակա մշակութային շերտեր:

Այդ արժեքների ուսումնասիրության և իրավական կարգավորման հետ կապված հարցերը պահանջում են համապատասխան միջազգային չափանիշների կիրառում, ինչն էլ հնարավոր կլինի ապահովել այս փաստաթղթի վավերացումից հետո: