Շինարարի օրը Հայաստանում նշվել է հանդիսավորությամբ․ Շինարարների միությունը տոնում է 30-ամյակը

Հայաստանի Հանրապետությունում մեծ հանդիսավորությամբ նշվել է Շինարարի մասնագիտական տոնը, որն այս տարի նշանավորվել է նաև Հայաստանի շինարարների միության գործունեության 30-ամյա հոբելյանով։

Ինչպես տեղեկացնում են ՀՀ քաղաքաշինության կոմիտեից, թեև Շինարարի օրն ավանդաբար նշվում է յուրաքանչյուր տարվա օգոստոսի երկրորդ կիրակի օրը, Քաղաքաշինության կոմիտեն և Հայաստանի շինարարների միությունը, համատեղելով կրկնակի տոնի առիթը, օգոստոսի 7-ին կազմակերպել են հանդիսավոր միջոցառում։

Միջոցառմանը ներկա են գտնվել ՀՀ փոխվարչապետ Տիգրան Խաչատրյանը, օրենսդիր և գործադիր մարմինների բարձրաստիճան պաշտոնյաներ, ինչպես նաև շինարարության ոլորտի բազմաթիվ ներկայացուցիչներ։

 

Շնորհավորելով շինարարներին մասնագիտական տոնի առթիվ՝ ՀՀ փոխվարչապետ Տիգրան Խաչատրյանը բարձր է գնահատել նրանց անմնացորդ նվիրումն ու պատասխանատու աշխատանքը։ Փոխվարչապետն ընդգծել է, որ շինարարության ոլորտը մշտապես հանդիսացել է Հայաստանի սոցիալ-տնտեսական զարգացման կարևորագույն հենասյուներից մեկը։

Անդրադառնալով Հայաստանի շինարարների միության 30-ամյա գործունեությանը՝ Տիգրան Խաչատրյանը կարևորել է միության առանցքային դերակատարումը ոլորտի զարգացման գործում և վստահություն հայտնել, որ այն կշարունակի արդյունավետորեն նպաստել պետություն-մասնավոր փոխգործակցության ամրապնդմանը։

 

Ոլորտի նվիրյալներին շնորհավորել է նաև ՀՀ կրթության, գիտության, մշակույթի և սպորտի նախարար Ժաննա Անդրեասյանը։ Նա նշել է, որ հանրապետությունում իրականացվող մեծածավալ շինարարական ծրագրերի միջոցով ձևավորվում է մասնագիտական նոր փորձառություն։

Այս համատեքստում նախարարն առանձնակի անդրադարձ է կատարել ֆուտբոլի մինչև 20 տարեկանների աշխարհի 2029 թվականի առաջնության անցկացման նպատակով նախատեսվող նոր մարզադաշտերի կառուցման աշխատանքներին։ Ելույթից հետո Ժաննա Անդրեասյանը ոլորտի մի շարք ներկայացուցիչների հանձնել է ԿԳՄՍ նախարարության ոսկե մեդալներ և շնորհակալագրեր։

 

Համադրելի ցուցանիշներ և ոլորտային բարեփոխումներ է ներկայացրել ՀՀ քաղաքաշինության կոմիտեի նախագահ Եղիազար Վարդանյանը։ Նա ընդգծել է, որ Հայաստանի տնտեսական ակտիվության ցուցանիշում շինարարության ոլորտը շարունակում է պահպանել առաջատարի դիրքերը։

«Շինարարությունն իրականացնել որակով և սահմանված ժամկետում․ սա է շարունակում լինել գլխավոր պահանջը շինարարներից։ Քաղաքաշինության կոմիտեն որդեգրել է ոլորտի բարեփոխման հստակ ուղի, որը, հուսով եմ, կանցնենք ձեզ հետ միասին։ Կոմիտեն էականորեն արագացրել և դյուրացրել է նախագծումից մինչև ավարտական փուլ թույլատվական փաստաթղթերի ստացման գործընթացները։ Բազմամասնաշենք համալիրների դեպքում ստեղծվել է ավարտական փաստաթղթերի փուլային ստացման հնարավորություն։ Առաջիկայում հասնելու ենք ավարտական ակտի ինքնաշխատ ստացման»,- նշել է Եղիազար Վարդանյանը՝ տեղեկացնելով, որ առաջիկա առաջնահերթություններից է լինելու նաև թվային համակարգերի կիրառմամբ տեխնիկական հսկողության նշաձողի բարձրացումը։

 

Հայաստանի շինարարների միության նախագահ Վահան Հարությունյանն իր շնորհավորական խոսքում բարձր է գնահատել ոլորտում ներգրավված բոլոր մասնագետների վաստակը․

«Շինարարների միությունը ոլորտի մասնագիտական հեղինակավոր հարթակ է, որն արդեն երեք տասնամյակ միավորում է շինարարներին, նախագծողներին, ճարտարապետներին, ինժեներներին, արտադրողներին և ոլորտի բոլոր այն մասնագետներին, ովքեր իրենց աշխատանքով կերտում են Հայաստանի քաղաքներն ու համայնքները»,- ընդգծել է նա։

Վահան Հարությունյանը և Եղիազար Վարդանյանը ոլորտի մի խումբ ներկայացուցիչների հանձնել են «Քաղաքաշինության բնագավառում նշանակալի ավանդի համար» ոսկե մեդալներ և Քաղաքաշինության կոմիտեի շնորհակալագրեր։

Շինարարներին շնորհավորել և պարգևատրել է նաև Երևանի քաղաքապետի տեղակալ Լևոն Հովհաննիսյանը՝ նրանց հանձնելով «Էրեբունի Երևան 2800-ամյակի» հուշամեդալներ և Երևանի քաղաքապետի պատվոգրեր։

Հանդիսավոր միջոցառումն ամփոփվել է տոնական երաժշտական կատարումներով և Հայաստանի շինարարության ոլորտի ձեռքբերումներին նվիրված տեսանյութի ցուցադրությամբ։