Ծնողները հավաքվել են ՊՆ շենքի մոտ՝ պահանջելով կրճատել արդեն ծառայող զինվորների ծառայության ժամկետը

Պարտադիր զինվորական ծառայություն անցնող զինծառայողների մեծ թվով ծնողներ այսօր՝ ապրիլի 3-ին, հավաքվել են ՀՀ պաշտպանության նախարարության շենքի մոտ։ Նրանք պահանջում են, որ իրենց որդիների վրա ևս տարածվի ծառայության ժամկետի կրճատման՝ 1.5 տարվա (18 ամիս) դրույթը։

Հիշեցնենք, որ ընդունված օրենսդրական փոփոխություններով նախատեսվում է պարտադիր զինվորական ծառայության ժամկետի կրճատում՝ 24 ամսից մինչև 18 ամիս՝ սկսած 2025 թվականի ձմեռային զորակոչից։ Սակայն այս փոփոխությունները չեն վերաբերում արդեն ծառայության մեջ գտնվող զինծառայողներին։

Այս հանգամանքը ծնողների շրջանում առաջացրել է արդարության և հավասարության հետ կապված լուրջ մտահոգություններ։

ՀՀ պաշտպանության նախարար Սուրեն Պապիկյանը Ազգային ժողովում լրագրողների հետ ճեպազրույցի ընթացքում նշել էր, որ որևէ փոփոխություն չի նախատեսվում։ Նրա խոսքով՝ ծառայության ժամկետը 6 ամսով կրճատելու որոշման հիմքում դրված են հստակ հաշվարկներ։