Վստահ եմ, որ Ձեր պաշտոնավարումը կնպաստի Ազգային ժողովի ինստիտուցիոնալ զարգացմանը. ՀՀ նախագահը՝ նորընտիր ԱԺ նախագահին

Հանրապետության նախագահ Վահագն Խաչատուրյանը շնորհավորական ուղերձ է հղել Ռուբեն Ռուբինյանին՝ Հայաստանի Հանրապետության 9-րդ գումարման Ազգային ժողովի նախագահի պաշտոնում ընտրվելու առթիվ՝ մաղթելով հաջողություններ այդ պատասխանատու առաքելության մեջ։

Իր ուղերձում նախագահն ընդգծել է Ազգային ժողովի առանցքային դերը պետականաշինության գործում՝ այն անվանելով պետականության հիմնարար սահմանադրական ինստիտուտներից մեկը։

Վահագն Խաչատուրյանի խոսքով՝ ԱԺ նախագահի պաշտոնը ենթադրում է առանձնահատուկ առաքելություն՝ ուղղված.

• Օրենսդիր իշխանության արդյունավետության բարձրացմանը,

• Խորհրդարանական բնականոն գործունեության ապահովմանը և արդյունավետ օրենսդրական աշխատանքի կազմակերպմանը,

• Կառուցողական քաղաքական երկխոսության խթանմանն ու հանրային վստահության ամրապնդմանը,

• Պետական իշխանության ճյուղերի միջև սահմանադրական հավասարակշռության ամրապնդմանը։

Հանրապետության նախագահը վստահություն է հայտնել, որ Ռուբեն Ռուբինյանի պաշտոնավարումը կնպաստի Ազգային ժողովի ինստիտուցիոնալ զարգացմանը, խորհրդարանական մշակույթի հետագա ամրապնդմանը և այնպիսի որոշումների կայացմանը, որոնք կծառայեն ՀՀ պետական շահին, ժողովրդավարության զարգացմանն ու քաղաքացիների բարօրությանը։

«Մաղթում եմ Ձեզ արգասաբեր գործունեություն, անսպառ եռանդ և նորանոր հաջողություններ՝ ի շահ Հայաստանի Հանրապետության, նրա սահմանադրական ինստիտուտների ամրապնդման, մեր պետության առաջընթացի և ժողովրդի բարեկեցիկ ու անվտանգ ապագայի»,— ասված է նախագահի ուղերձում։