X հարթակում տարածվում է Storm1516-ին վերագրվող համակարգված ապատեղեկատվություն․ Նազելի Բաղդասարյան

Storm1516 ցանցին վերագրվող համակարգված ապատեղեկատվական արշավ է ակտիվորեն տարածվում X հարթակում՝ ոչ իսկական և փոխկապակցված հաշիվների միջոցով, այս մասին X- ի իր էջում գրել է ՀՀ վարչապետի մամուլի քարտուղար Նազելի Բաղդասարյանը։

 Ըստ Նազելի Բաղդասարյանի՝ տարածվող տեսանյութերը կեղծ են, մանիպուլացված և ստեղծված արհեստական բանականության գործիքներով։ Դրանցում արված պնդումները ամբողջությամբ սուտ են, իրականության հետ կապ չունեն և ակնհայտորեն նպատակ ունեն մանիպուլացնել հանրային ընկալումը՝ սինթետիկ և խաբուսիկ բովանդակության միջոցով։

 «Որպես կառավարության հակաապատեղեկատվական և FIMI (օտարերկրյա տեղեկատվական մանիպուլացիայի և միջամտության) ջանքերի համակարգող՝ ես պարբերաբար նման տեղեկատվական հարձակումների թիրախ եմ դառնում։ Այս գործողությունները ուղղված են ոչ միայն անհատների, այլ նաև պետական ինստիտուտների նկատմամբ վստահությունը խաթարելուն և տեղեկատվական միջավայրին միջամտելուն՝ համակարգված մանիպուլյացիայի միջոցով։

Այս արշավը ևս մեկ օրինակ է այն հիբրիդային տեղեկատվական սպառնալիքների, որոնք պարբերաբար ուղղվում են Հայաստանի պետական կառույցների և պաշտոնյաների դեմ», – հայտարարել է Բաղդասարյանը։