Զելենսկին՝ Հայաստանի ընտրությունների մասին. «Դա մեծ հաջողություն էր Հայաստանի անկախության և ժողովրդի ընտրության համար»

Ուկրաինայի նախագահ Վոլոդիմիր Զելենսկին  բրիտանական The Guardian պարբերականին տված հարցազրույցում  անդրադարձել է Ռուսաստանի ազդեցության թուլացմանն ու տարածաշրջանային զարգացումներին՝ առանձնահատուկ ընդգծելով Հայաստանում տեղի ունեցած ընտրությունների նշանակությունը։

Զելենսկին նշել է, որ Ռուսաստանը աստիճանաբար կորցնում է իր քաղաքական ազդեցությունը մի շարք երկրներում և որպես օրինակ մատնանշել է Ադրբեջանն ու Հայաստանը։

«Տեսե՜ք Ադրբեջանը՝ այն անկախ է։ Տեսե՜ք Հայաստանը։ Երեկ տեղի ունեցած ընտրությունները մեծ հաջողություն էին Հայաստանի անկախության և ժողովրդի ընտրության համար։ Դա մեծ հաջողություն է»,– ասել է Ուկրաինայի նախագահը։

Նա նաև կարծիք է հայտնել, որ Ռուսաստանը կորցրել է իր ազդեցությունը Մոլդովայում և չի ցանկանում կորցնել Ուկրաինան, քանի որ վերջինս, ըստ նրա, քաղաքական առումով ամենակարևոր և ամենազգայուն ուղղություններից մեկն է Մոսկվայի համար։

Զելենսկին ընդգծել է, որ ռուսական հասարակության շրջանում իրավիճակի իրական ընկալման խորացման դեպքում հնարավոր են զգալի քաղաքական փոփոխություններ, միաժամանակ շեշտելով ուկրաինական զինված ուժերի կարևոր դերը երկրի դիմադրության գործում։

«Դա կախված է մեր զինվորներից։ Նրանք շատ ուժեղ են։ Մենք ամեն օր կաջակցենք նրանց»,– նշել է Ուկրաինայի նախագահը։