Ժաննա Անդրեասյանն ընդունել է Եգիպտոսի նորանշանակ դեսպանին. քննարկվել են մշակութային եվ կրթական համատեղ ծրագրեր

ՀՀ ԿԳՄՍ նախարար Ժաննա Անդրեասյանն ընդունել է Հայաստանի Հանրապետությունում Եգիպտոսի Արաբական Հանրապետության նորանշանակ դեսպան Ամալ Աֆիֆիին: Այս մասին տեղեկացնում են ԿԳՄՍ նախարարությունից:

Հանդիպմանը ներկա են եղել նախարարի տեղակալ Արթուր Մարտիրոսյանը, Եգիպտոսի համալսարանի նախագահ, հայագիտության պրոֆեսոր Մոհամեդ Ռեֆաատ ալ Իմամը եվ գրող, հեռուստահաղորդավար, դոկտոր Սաֆաա էլ Նագգարը:

Ժաննա Անդրեասյանը շնորհավորել է դեսպանին նշանակվելու կապակցությամբ եվ վստահություն հայտնել, որ նրա գործունեությունը կնպաստի երկկողմ հարաբերությունների զարգացմանը՝ մասնավորապես կրթության, գիտության, մշակույթի եվ երիտասարդության ոլորտներում:

Դեսպան Ամալ Աֆիֆիին հայտնել է մշակույթի ոլորտում համագործակցության ակտիվացման ուղղությամբ առավելագույն ջանքեր ներդնելու պատրաստակամությունը եվ նախարարին է ներկայացրել առաջիկայում Եգիպտոսում նախատեսվող միջոցառումների ծրագիրը:

Նախարարն առանձնակի անդրադարձել է պատվիրակության կազմում ընդգրկված մտավորականների գործունեությանը՝ բարձր գնահատելով պրոֆեսոր Մոհամեդ Ռեֆաատ ալ Իմամի երկարամյա ներդրումը հայագիտության հանրահռչակման գործում.

• Պրոֆեսորը երկար տարիներ աջակցել է Կահիրեի համալսարանի Հայագիտական ուսումնասիրությունների կենտրոնի գործունեությանը,

• Ղեկավարել է արաբերեն հայագիտական «Արեգ» (AREG) ամսագրի խմբագրությունը, որն էական դեր է ունեցել արաբալեզու ընթերցողների շրջանում հայության վերաբերյալ գիտելիքի տարածման գործում։

Իր գործունեությունն է ներկայացրել նաև դոկտոր Սաֆաա էլ Նագգարը:

Հանդիպման ընթացքում նշվել է, որ կողմերը կարող են համագործակցել նաև Գրքի միջազգային փառատոնի շրջանակում՝ թարգմանական ծրագրերի իրականացմամբ: Քննարկվել են երկուստեք հետաքրքրություն ներկայացնող այլ հարցեր: