5 կգ թմրամիջոցն ապօրինի իրացնելու փորձ կատարած 3 անձինք կալանավորվել են

 ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում քննվող քրեական վարույթով փաստական տվյալներ են ձեռք բերվել օտարերկրյա քաղաքացու կողմից առանձնապես խոշոր չափերով՝ շուրջ 5 կգ «Մարիխուանա» տեսակի թմրամիջոց Հայաստան մաքսանենգելու վերաբերյալ։ Այս մասին հայտնում է Քննչական կոմիտեի պաշտոնական աղբյուրը։

ՔԿ և ՆԳՆ ոստիկանության աշխատակիցների համատեղ օպերատիվ-հետախուզական միջոցառումների արդյունքում պարզվել է թմրամիջոցի տեղադրման (թաքստոցի) վայրը։ Փաթեթները վերցնելու պահին ձերբակալվել և վարույթն իրականացնող մարմնին են ներկայացվել Երևան քաղաքի բնակիչներ Ա.Մ.-ն, Տ.Բ.-ն և Դ.Բ.-ն։

Հսկող դատախազի որոշմամբ ձերբակալվածների նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 44-393-րդ հոդվածի 3-րդ մասի 2-րդ կետով (առանձնապես խոշոր չափերով թմրամիջոցների ապօրինի իրացնելու փորձը)։ Նրանց նկատմամբ որպես խափանման միջոց է ընտրվել կալանավորումը։

Նախաքննությունը շարունակվում է։