Ինչպես է «խորամանկում» Shirak Avia-ն․ Կարեն Հեքիմյան

Հասարակական գործիչ Կարեն Հեքիմյանը ֆեյսբուքյան իր էջում անդրադարձել է «Shirak Avia» ավիաընկերության կողմից Երևան-Մոսկվա չվերթի սպասարկման հետ կապված մի դեպքի՝ ընկերությանը մեղադրելով ուղևորներին մոլորեցնելու և պատշաճ սպասարկում չապահովելու մեջ։

Հեքիմյանի փոխանցմամբ՝ քաղաքացին, ավելի մատչելի ավիատոմս ձեռք բերելու նպատակով, ամիսներ առաջ գնել է Երևան-Մոսկվա չվերթի տոմսեր՝ իր և երեք մանկահասակ երեխաների համար։

Գործչի ներկայացմամբ՝ նախատեսված թռիչքից երկու օր առաջ ավիաընկերության ներկայացուցիչները կապ են հաստատել ուղևորի հետ՝ տեղեկացնելով, որ չվերթը չեղարկվել է, և առաջարկել մեկնել մեկ օր շուտ՝ նախատեսված ժամից շուրջ 12-13 ժամ առաջ։ Քաղաքացին, ըստ Հեքիմյանի, համաձայնել է առաջարկին։

Սակայն, ինչպես նշում է հասարակական գործիչը, թռիչքի ընթացքում ուղևորներին հայտնել են, որ Մոսկվայի օդային տարածքը փակ է, ինչի հետևանքով ինքնաթիռը չի կարող վայրէջք կատարել նախատեսված օդանավակայանում։ Ինքնաթիռն իջեցվել է Ռուսաստանի Ուֆա քաղաքի օդանավակայանում։

Հեքիմյանի պնդմամբ՝ ուղևորներին այնտեղ անհրաժեշտ պայմաններ չեն ապահովել, և քաղաքացին երեք մանկահասակ երեխաների հետ շուրջ 18 ժամ ստիպված է եղել մնալ օդանավակայանում՝ առանց սննդի և ջրի։

Գրառման հեղինակի խոսքով՝ Ուֆայի օդանավակայանում քաղաքացին տեղեկացել է, որ այն չվերթը, որի տոմսերը նախապես ձեռք էր բերել, իրականում չի չեղարկվել, և ինքնաթիռը սահմանված ժամին վայրէջք է կատարել Մոսկվայում։

Կարեն Հեքիմյանը կատարվածը որակել է որպես ուղևորներին մոլորեցնելու հնարավոր սխեմա՝ ենթադրելով, որ չվերթի չեղարկման մասին տեղեկությունը կարող էր օգտագործվել տոմսերը վերավաճառելու նպատակով։

Նրա փոխանցմամբ՝ քաղաքացուն և երեք երեխաներին Մոսկվա հասնելու համար ընդհանուր առմամբ շուրջ 21 ժամ է պահանջվել։

Նշենք, որ ներկայացված տեղեկությունները Կարեն Հեքիմյանի ֆեյսբուքյան գրառման հիման վրա են։ Դեպքի հանգամանքների և ավիաընկերության գործողությունների վերաբերյալ «Shirak Avia»-ի պարզաբանումը հրապարակման պահին ներկայացված չէ։