Աբբաս Արաղչին բացահայտում է ԱՄՆ-ի և Իսրայելի կողմից դպրոցի վրա հարվածը և պահանջում է համաշխարհային արդարություն ՄԱԿ-ի Մարդու իրավունքների խորհրդում

ՄԱԿ-ում հրատապ քննարկման ընթացքում Իրանի արտաքին գործերի նախարար Աբբաս Արաղչին խիստ մեղադրանքներ է հնչեցրել ԱՄՆ-ի և Իսրայելի հասցեին՝ հայտարարելով, որ երկիրը հայտնվել է «անօրինական պատերազմի կենտրոնում»։

Իրանի ներկայացուցիչը նշել է. «Իրանն այսօր կանգնած է երկու միջուկային տերությունների՝ ԱՄՆ-ի և Իսրայելի կողմից պարտադրված անօրինական պատերազմի կենտրոնում։ Այս ագրեսիան բացահայտորեն անհիմն է և դաժան»՝ հավելելով, որ հարձակումը սկսվել է փետրվարի 28-ին՝ դիվանագիտական գործընթացի ընթացքում։

Նրա խոսքով՝ ամենասարսափելի դեպքերից մեկը Մինաբ քաղաքում դպրոցի վրա հարձակումն էր. «Այս ագրեսիայի ամենասարսափելի դրսևորումներից մեկը Իրանի հարավում գտնվող Մինաբ քաղաքի «Շաջարատա» տարրական դպրոցի վրա հաշվարկված և փուլային հարձակումն էր, որտեղ սառնասրտորեն սպանվեցին ավելի քան 175 աշակերտներ և ուսուցիչներ»։

Իրանը պնդել է, որ հարվածը դիտավորյալ էր. «Ոչ ոք չի կարող հավատալ, որ դպրոցի վրա հարձակումը եղել է այլ բան, քան կանխամտածված և դիտավորյալ։ Դպրոցի թիրախավորումը պատերազմական հանցագործություն էր և հանցագործություն մարդկության դեմ»։

Նա իր ելույթում նաև նշվել է, որ պատերազմի ընթացքում զանգվածաբար խախտվել են մարդու իրավունքները. «Իրանում ավելի քան 600 դպրոց է քանդվել կամ վնասվել, ավելի քան 1000 աշակերտ և ուսուցիչ նահատակվել կամ վիրավորվել է»։

Միաժամանակ Իրանը հայտարարել է, որ «երբեք պատերազմ չի փնտրել», սակայն պատրաստ է պաշտպանվել։

Նիստի նախագահողը, իր հերթին, կոչ է արել պահպանել ՄԱԿ-ի չափանիշները. «Թույլ տվեք խնդրել բոլոր պատվիրակություններին մարդու իրավունքների հարցերին վերաբերվել արժանապատվորեն և հիշեցնել՝ պահպանել ՄԱԿ-ի ստանդարտները երկրներին հղում անելիս»։

Նորվեգիայի ներկայացուցիչը, խոսելով նաև Իսլանդիայի անունից, ընդգծել է տարածաշրջանում ստեղծված ծանր իրավիճակը. «Մերձավոր Արևելքը հրդեհի մեջ է։ Մարդկային տառապանքը ծանր է և անմիջական»։ Նա անընդունելի է համարել երեխաների մահը՝ նշելով. «Պատերազմի առաջին օրը ավելի քան 170 երեխա է սպանվել Մինաբի աղջիկների դպրոցի հարվածի ժամանակ։ Սա անընդունելի է»։

Նրա խոսքով՝ «ո՛չ ԱՄՆ-ի և Իսրայելի հարվածները Իրանին, ո՛չ էլ Իրանի հարձակումները տարածաշրջանի երկրների վրա համահունչ չեն միջազգային իրավունքին», և կոչ է արել դադարեցնել պատերազմը։

Եվրոպական Միության ներկայացուցիչը ևս ցավ է հայտնել զոհերի կապակցությամբ. «ԵՄ-ն ցավում է բոլոր քաղաքացիական անձանց կորստի համար և կոչ է անում անհապաղ դադարեցնել հարվածները քաղաքացիական ենթակառուցվածքների վրա»։

Նա նաև նշել է. «Մենք խորապես վշտացած ենք Իրանում երեխաների մահվան կապակցությամբ, ներառյալ Մինաբի դպրոցի հարվածը», միաժամանակ կոչ անելով Իրանին «դադարեցնել բռնությունն ու ճնշումները սեփական ժողովրդի դեմ»։