Ադրբեջանը Նախիջևանում կանցկացնի «Վերադարձ Արևմտյան Ադրբեջան» խորագրով համագումար և փառատոն

«Վերադարձ Արևմտյան Ադրբեջան» խորագրով երրորդ փառատոն-համագումարը կանցկացվի Նախիջևանի Ինքնավար Հանրապետությունում, հայտնում են ադրբեջանական լրատվամիջոցները։

 Միջոցառումը նախատեսված է հունիսի 18–19-ը Օրդուբադում։ Այն համատեղ կազմակերպվում է Նախիջևանում նախագահի լիազոր ներկայացուցչության, Ադրբեջանի գիտության և կրթության նախարարության, Նախիջևանի պետական համալսարանի և այսպես կոչված «Արևմտյան Ադրբեջանի համայնք» կազմակերպության կողմից։

Համագումարի ընթացքում գիտնականները, հետազոտողները և հասարակական գործիչները կներկայացնեն զեկույցներ «Արևմտյան Ադրբեջանի» իրողությունների, պատմական ժառանգության և վերադարձի հեռանկարների վերաբերյալ։

Փառատոնի ծրագրում նախատեսված են ազգային և մշակութային արժեքները, արվեստի գործերը և միասնության թեման ներկայացնող ցուցադրություններ։

Երևանից բազմիցս հայտարարել են, որ չկա և չի կարող լինել «Արևմտյան Ադրբեջան» Հայաստանի Հանրապետության ինքնիշխան տարածքում, և այս հարցով քննարկումը բացառված է։