Ադրբեջանի Դյուբենդի լողափում նավթային արտահոսք է հայտնաբերվել

 Ադրբեջանի Դյուբենդի լողափի տարածքում հայտնաբերվել է նավթային աղտոտում, որի մասին հունիսի 19-ին տեղեկություն է ստացվել «Азнефть» արտադրական միավորումից, այս մասին հայտնում են ադրբեջանական լրատվամիջոցները:

Պիրալլահի կղզու և Դյուբենդի միջև գտնվող ջրային տարածքի զննման ընթացքում հայտնաբերվել է նավթային բիծ։ Ավելի ուշ պարզվել է, որ աղտոտման աղբյուրը «Азнефть»-ին պատկանող ստորջրյա նավթամուղն է։

Նավթի տեղափոխումը տվյալ հատվածով անմիջապես դադարեցվել է, իսկ արտահոսքի տեղում ստեղծվել է օպերատիվ շտաբ։ Հետաքննությամբ պարզվել է, որ խողովակաշարը մեխանիկական վնաս է ստացել, հավանաբար՝ արտաքին ազդեցության, հնարավոր է՝ խարիսխի հարվածի հետևանքով։

Վնասված հատվածում արդեն սկսվել են վերականգնման աշխատանքները, իսկ աղտոտման հետևանքների վերացումը՝ ներառյալ ծովի և ափամերձ տարածքների մաքրումը: