ԱՄՆ-ը բռնագրավել է իրանական բեռնատար նավը, Հորմուզի նեղուցը շարունակում է փակ մնալ

ԱՄՆ նախագահ Դոնալդ Թրամփը մեղադրել է Իրանին հրադադարի պայմանները խախտելու մեջ և կրկին սպառնացել է Թեհրանին՝ երկրի կարևոր ենթակառուցվածքները, այդ թվում՝ կամուրջներն ու էլեկտրակայանները, ոչնչացնելու խոստումով։ Իրանի իշխանություններն, իրենց հերթին, ԱՄՆ-ին են մեղադրել հրադադարի խախտման մեջ այն բանից հետո, երբ ամերիկյան զինվորականները Օմանի ծոցում գրավել են իրանական դրոշով բեռնատար նավը, հայտնում է BBC–ն։

Միևնույն ժամանակ, Հորմուզի նեղուցը, որով սովորաբար իրականացվում է Մերձավոր Արևելքի նավթի մատակարարումը, շարունակում է փակ մնալ։

«Այսօր իրանական դրոշով "Touska" բեռնատար նավը, որի երկարությունը մոտ 900 ֆուտ է([մոտ 275 մետր) և որի քաշը համեմատելի է ավիակիրի հետ, փորձել է ճեղքել մեր ծովային շրջափակումը, սակայն դա նրանց չի հաջողվել։ ԱՄՆ ռազմածովային ուժերի Spruance հրթիռային էսկադրային կործանիչը Օմանի ծոցում կասեցրել է «Touska»–ն  և հստակ նախազգուշացում տվել կանգ առնելու մասին։ Իրանցի անձնակազմը հրաժարվել է ենթարկվել, ուստի մեր նավը կանգնեցրել է նրանց՝ անցք բացելով մեքենայական բաժնում», — գրել է Թրամփը իր Truth Social սոցիալական ցանցում։

«Ներկայումս նավը գտնվում է ԱՄՆ ծովային հետևակի վերահսկողության տակ։ «Touska»-ն գտնվում է ԱՄՆ ֆինանսների նախարարության պատժամիջոցների տակ՝ իր նախկին անօրինական գործունեության պատճառով։ Մենք ամբողջությամբ վերահսկում ենք նավը և ստուգում ենք, թե ինչ կա բեռի մեջ», — հավելել է ԱՄՆ նախագահը։

Իրանի իշխանությունները նավի բռնագրավումը որակել են որպես «ծովահենություն» և «հրադադարի խախտում»՝ խոստանալով պատասխան քայլեր ձեռնարկել։