Անցած 1 օրում գրանցվել է 15 ավտովթար․ 2 մարդ զոհվել է

ՀՀ ՆԳՆ ոստիկանության ստորաբաժանումները վերջին մեկ օրվա ընթացքում հանրապետությունում բացահայտել են 168 հանցագործություն, որոնցից 3-ը՝ նախկինում կատարված:

Անցած մեկ օրում գրանցվել է նաև ճանապարհատրանսպորտային պատահարների աճ. արձանագրվել է 15 ավտովթար, որոնց հետևանքով 2 մարդ զոհվել է, ևս 19-ը՝ ստացել տարբեր աստիճանի մարմնական վնասվածքներ:

Ըստ Ոստիկանության վիճակագրության՝ բացահայտված իրավախախտումների գերակշիռ մասը վերաբերում է տրանսպորտային ոլորտին: Մասնավորապես արձանագրվել է.

• 64 դեպք՝ տրանսպորտային միջոց վարելու իրավունքից զրկված, այդ իրավունքը կասեցված կամ վարորդական վկայական չունեցող անձանց կողմից ղեկին հայտնվելու,
• 16 դեպք՝ մարմնական վնասվածք պատճառելու,
• 14 դեպք՝ ֆիզիկական ներգործության,
• 9 դեպք՝ խարդախության,
• 8 դեպք՝ հոգեկան ներգործության,
• 6 դեպք՝ փաստաթղթեր կեղծելու,
• 5-ական դեպք՝ անձնական գույքի գողության, խուլիգանության և սառը զենք կրելու,
• 4 դեպք՝ թմրանյութի հայտնաբերման:

Բացի այդ, արձանագրվել են պաշտոնեական կեղծիքի կամ անփութության (3 դեպք), արգելված բույսեր ցանելու կամ աճեցնելու (3 դեպք), ապօրինի ձեռնարկատիրության (2 դեպք), գույքի ոչնչացման (2 դեպք) և թմրանյութերի իրացման (2 դեպք) դեպքեր:

Իրավապահները բացահայտել են նաև վստահված գույքի հափշտակման, պաշտոնեական դիրքի չարաշահման, ապօրինի ծառահատումների, սահմանն ապօրինի հատելու, աշխատանքի պաշտպանության կանոնների խախտման, ինքնիրավչության և զենք-զինամթերքի պատրաստման ու ձևափոխման այլ դեպքեր։

Նախկինում կատարված հանցագործություններից բացահայտվել է անձնական ունեցվածքի գողության 3 դեպք, ինչպես նաև սպանության փորձի և համակարգչային հափշտակության 1-ական դեպք:

Օրվա ընթացքում իրավապահների կողմից հայտնաբերվել է 16 հետախուզվող, և արձանագրվել է զենք-զինամթերքի կամավոր հանձնման 1 դեպք։