Արաքսիա Սվաջյանը հետևել է անգլերենի միասնական քննության ընթացքին

Հայաստանում ընթացքի մեջ է 2026 թվականի բուհերի ընդունելության միասնական քննությունների երկրորդ՝ հիմնական փուլը։ ԿԳՄՍ նախարարության փոխանցմամբ՝ այսօր դիմորդներն իրենց ուժերն են փորձում օտար լեզուներից (անգլերեն, ֆրանսերեն, գերմաներեն, իսպաներեն, իտալերեն, պարսկերեն)։

Քննական գործընթացի ընթացքին հետևելու նպատակով Երևանի թիվ 57 հիմնական դպրոցում տեղակայված քննական կենտրոն է այցելել ԿԳՄՍ նախարարի տեղակալ Արաքսիա Սվաջյանը։ Նա շրջել է քննասենյակներում, զրուցել դիմորդների հետ՝ հետաքրքրվելով նրանց մասնագիտական կողմնորոշմամբ ու նախորդ փուլի արդյունքներով, ինչպես նաև հաջողություն մաղթել քննություն հանձնողներին։ Նշված կենտրոնում այսօր քննություն է հանձնում շուրջ 110 դիմորդ։

Գնահատման և թեստավորման կենտրոնի (ԳԹԿ) հրապարակած տվյալների համաձայն՝ այս տարվա քննական պատկերն ունի հետևյալ տեսքը.

• Ընդհանուր դիմորդների թիվը՝ 16,426 հայտագրված։

• Ամենապահանջված քննական առարկաների թոփ 3-յակը.

  1. Անգլերեն — 5,757 դիմորդ,

  2. Մաթեմատիկա — 5,467 դիմորդ,

  3. Հայոց լեզու և հայ գրականություն — 4,232 դիմորդ։

Օրացույց դիմորդների համար. Հաջորդ միասնական քննությունը տեղի կունենա հունիսի 19-ին՝ «Մաթեմատիկա» առարկայից։ Հիմնական փուլի վերջին քննական օրը հունիսի 30-ն է։