Արգամ Աբրահամյանը չի ընդունում մեղքը ու անհիմն է համարում մեղադրանքը. փաստաբան

Արտաշատի նախկին համայնքապետ, ԱԺ նախկին պատգամավոր, նախկին վարչապետ Հովիկ Աբրահամյանի որդի Արգամ Աբրահամյանը չի ընդունում իրեն առաջադրված մեղադրանքը և այն համարում է ծայրաստիճան անհիմն։ Այս մասին NEWS.am-ի հետ զրույցում հայտնել է նրա փաստաբան Էմին Խաչատրյանը։

Փաստաբանի փոխանցմամբ՝ Աբրահամյանը որևէ առնչություն չունի առաջադրված մեղադրանքի հետ։ «Այս փուլում որպես դիրքորոշում ընդունեք, որ Արգամ Աբրահամյանը իրեն մեղավոր չի ճանաչում. ինքը դիրքորոշում է հայտնել, որ այն աստիճան անհիմն մեղադրանք է, որ նույնիսկ դրա մասով մեկնաբանություն չի տալիս»,- նշել է Խաչատրյանը՝ հավելելով, որ պաշտպանական թիմն ավելի ուշ հանդես կգա համապարփակ հայտարարությամբ։

Պատասխանելով հարցին, թե արդյոք գործընթացը կապ ունի Գագիկ Ծառուկյանի դեմ ընթացող գործերի հետ (Արգամ Աբրահամյանը Ծառուկյանի փեսան է), փաստաբանը զերծ է մնացել մեկնաբանությունից՝ նշելով, որ Աբրահամյանն ինքը քաղաքական ենթատեքստի վերաբերյալ հայտարարություններ չի արել։

Հիշեցնենք, որ Արգամ Աբրահամյանը երկու ամսով կալանավորվել է։

Ըստ Քննչական կոմիտեի՝ նրան մեղադրանք է առաջադրվել 2023 թվականի ապրիլի 30-ին Երևանի Մյասնիկյան պողոտայում կատարված սպանությունը պատվիրելու համար։ Իրավապահների պնդմամբ՝ Աբրահամյանը կնոջը կասկածել է «Ավետարանի հավատքի քրիստոնյաներ» կրոնական կազմակերպության հոգևոր հովվի հետ անձնական կապեր ունենալու և նրան խոշոր գումարներ փոխանցելու մեջ, ինչից ելնելով էլ՝ վրեժխնդրության շարժառիթով, իր անվտանգության աշխատակցի միջոցով կազմակերպել է նրա սպանությունը։