Առանց Վրաստանի՝ Հայաստանի եվրոինտեգրման մասին խոսելն աներևակայելի է. Կոբախիձե

«Imedi LIVE» հաղորդաշարի եթերում Վրաստանի վարչապետ Իրակլի Կոբախիձեն, անդրադառնալով Բրյուսելի որոշակի շրջանակների վերաբերմունքին Վրաստանի և Հայաստանի նկատմամբ, հայտարարել է, որ պաշտոնական Թբիլիսիի համար հարևան երկրի հետ համեմատվելն անընդունելի է, հայտնում են վրացական ԶԼՄ-ները:

«Մենք հարևաններ ենք, ունենք շատ բարեկամական հարաբերություններ և ռազմավարական գործընկերություն: Հետևաբար, մեր կողմից սխալ կլինի համեմատվել Հայաստանի հետ. մենք այդ դաշտ չենք մտնի»,- ընդգծել է Վրաստանի կառավարության ղեկավարը:

Կոբախիձեն շեշտել է, որ թե՛ ներքին, թե՛ արտաքին ուժերի կողմից երկու երկրները միմյանց հակադրելու բոլոր փորձերը ձախողման են դատապարտված: Նա վերահաստատել է Վրաստանի լիակատար աջակցությունը եղբայրական հայ ժողովրդին և բարձր է գնահատել երկկողմ հարաբերությունների ներկայիս դինամիկան։

Հարցազրույցի ընթացքում Վրաստանի վարչապետը հատուկ շնորհակալություն է հայտնել ՀՀ վարչապետ Նիկոլ Փաշինյանին՝ Վրաստանի նկատմամբ ունեցած առանձնահատուկ վերաբերմունքի համար, որն արտահայտվում է նաև կառավարությունների մակարդակով:

«Նա (Նիկոլ Փաշինյանը) ուղղակիորեն հայտարարել է, որ առանց Վրաստանի՝ Հայաստանի եվրոինտեգրման մասին խոսելն աներևակայելի է»,- հիշեցրել է Կոբախիձեն՝ միևնույն ժամանակ սուր քննադատության ու հեգնանքի ենթարկելով եվրոպացի բարձրաստիճան պաշտոնյաներից մեկի հաջորդած հայտարարությունը, թե իբր Հայաստանը Եվրոպան Միջին Ասիային կապող ամենակարճ ճանապարհն է։

«Ըստ ամենայնի, տնտեսական լճացման և այլ «բարիքների» հետ մեկտեղ, եվրոպացի բյուրոկրատների գործերը նաև աշխարհագրության դասերից այնքան էլ ուժեղ չեն»,- եզրափակել է Վրաստանի վարչապետը։