Արմավիրի քրեական ոստիկանները հավաքին մասնակցելու համար նյութապես շահագրգռելու դեպք են բացահայտել

Մայիսի 22-ին ՀՀ ՆԳՆ Քրեական ոստիկանության Արմավիրի մարզային վարչության ծառայողները օպերատիվ տեղեկություն են ստացել, ըստ որի՝ կուսակցություններից մեկի ներկայացուցիչ, Ծաղկալանջ գյուղի 37-ամյա բնակչի հովանավորչությամբ Գեղակերտ գյուղի 36-ամյա բնակիչը գումար է առաջարկել համագյուղացիներին՝ ապրիլին Երևանում կազմակերպված հավաքին մասնակցելու համար, այս մասին հայտնում է ՀՀ ՆԳՆ ոստիկանությունը։

Իրավապահների տվյալներով՝ 36-ամյա տղամարդը հինգ բնակչի փոխանցել է 15 հազարական դրամ։ Նույն օրը նրանք հրավիրվել են մարզային վարչություն և հաստատել տեղեկության իսկությունը։

Քրեական ոստիկանները պարզել են նաև, որ նույն սխեմայով շահագրգռվել են այլ համագյուղացիներ ևս։ Նախաձեռնված քրեական վարույթի շրջանակում մայիսի 23-ին իրականացված խուզարկությունների ընթացքում Գեղակերտի բնակիչներից մեկի տանը հայտնաբերվել է ապօրինի պահվող որսորդական հրացան, իսկ մեկ այլ բնակչի տանը՝ կանեփանման զանգված։

Ծաղկալանջի 37-ամյա և Գեղակերտի 36-ամյա բնակիչները ձերբակալվել են և ներկայացվել դատարան՝ կալանավորման միջնորդությամբ։ Նախաքննությունը շարունակվում է։