Արտառոց դեպք Երևանում. «SAS» սուպերմարկետի մենեջերը «FaceID»-ով նկարել է աշխատակցին և նրա անունով օնլայն վարկ ձևակերպել

Հունիսի 28-ին արտառոց դեպք է տեղի ունեցել Երևանում։ Ժամը 16։20-ի սահմաններում ՀՀ ներքին գործերի նախարարության համայնքային ոստիկանության գլխավոր վարչության Մարաշի բաժնում ահազանգ է ստացվել մարզերից մեկի բնակիչ, 20-ամյա Աննա Ս․-ից։

Ինչպես հայտնում է ֆոտոլրագրող Գագիկ Շամշյանը, ահազանգից հետո դեպքի վայր է մեկնել ոստիկանության Մարաշի բաժնի հերթապահ խումբը՝ ավագ համայնքային ոստիկանի գլխավորությամբ։

Աղջիկը իրավապահներին հայտնել է, որ հունիսի 14-ին, Քաջազնունի 9 Ա հասցեում գործող «SAS» սուպերմարկետում եղել է աշխատանքի, որտեղ իրեն է մոտեցել նույն սուպերմարկետի մենեջեր Էմման։

• Մենեջերը «ֆեյսայդիով» (FaceID) նկարել է աշխատակցուն՝ պատճառաբանելով, թե լուսանկարը պետք է ուղարկի գրասենյակ։

• Հունիսի 28-ին 20-ամյա աշխատակիցը հաղորդագրությամբ տեղեկացել է, որ խաբեությամբ և իր վստահությունը չարաշահելու եղանակով իր անունով «VTB» բանկով օնլայն վարկ են ձևակերպել։

Գ․ Շամշյանի տեղեկություններով՝ ոստիկանության Մարաշի բաժնի ծառայողների կողմից ձեռնարկված միջոցառումների արդյունքում պարզվել է, որ նշված խանութի մենեջեր Էմման հանդիսանում է Գեղարքունիքի մարզի բնակիչ, 36-ամյա Էմմա Պ․-ն։ Այժմ ձեռնարկվում են միջոցառումներ՝ վերջինիս հայտնաբերելու ուղղությամբ։

Աննա Ս․-ն նշված սուպերմարկետում աշխատում է որպես բաժնի պատասխանատու, իսկ Էմմա Պ․-ն՝ որպես մենեջեր։

Դեպքի փաստով ոստիկանության Մարաշի բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժին։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով դատարանի օրինական ուժի մեջ մտած դատավճռով։