Արժեթղթերի շուկան ակտիվացնելու առաջին քայլով վերացնելու ենք «բաց» և «փակ» բաժնետիրական ընկերությունների տարբերակումը․ Դիանա Հակոբյան

Հայաստանում արժեթղթերի շուկան ակտիվացնելու նպատակով նախատեսվում է վերացնել «բաց» (ԲԲԸ) և «փակ» (ՓԲԸ) բաժնետիրական ընկերությունների տարբերակումը։ Այս մասին հայտարարել է «Միասնության թևերի» տնտեսական թիմի անդամ, տնտեսագետ Դիանա Հակոբյանը։

Ըստ առաջարկվող ծրագրի՝ հայաստանյան ընկերությունները պետք է ընտրեն հետևյալ երկու տարբերակներից մեկը.

• Դառնալ իրական բաժնետիրական ընկերություն՝ ազատ շրջանառվող բաժնետոմսերով և բարձր հաշվետվողականությամբ,

• Վերակազմակերպվել ՍՊԸ-ի՝ որպես իրավական ավելի պարզ և համապատասխան ձևաչափ։

Դիանա Հակոբյանի փոխանցմամբ՝ հանրային մեծ նշանակություն և տնտեսության վրա բարձր ազդեցություն ունեցող մի շարք ոլորտների ընկերությունների համար բաժնետիրական ձևով գործելը կլինի պարտադիր։ Այդ ոլորտներն են.

1. Բանկային համակարգ,

2. Հեռահաղորդակցության օպերատորներ,

3. Էներգետիկայի բնագավառ,

4. Հանքարդյունաբերություն։

Այս փոփոխությունը ենթադրում է թափանցիկ հաշվետվողականություն, հստակ վերահսկողություն և ներդրողների մասնակցության լայն հնարավորություններ։

«Որքան մեծ է ընկերության ազդեցությունը հանրության վրա, այնքան բարձր պետք է լինի նրա թափանցիկությունն ու պատասխանատվությունը»,- ընդգծել է տնտեսագետը։