Այրված ավտոմեքենայում հայտնաբերվել են 3 մարմիններ

Երևան-Երասխ ավտոճանապարհին այս գիշեր տեղի ունեցած ողբերգական պատահարի հետևանքով 3 մարդ է մահացել։ Արարատի մարզի Սուրենավան գյուղի վարչական տարածքում հրդեհվել է «Nissan Rogue» մակնիշի ավտոմեքենա, որի մեջ հայտնաբերվել են քաղաքացիների կիսամոխրացած մարմինները։

Արտակարգ դեպքի մասին ահազանգը հրշեջ-փրկարարները ստացել են ժամը 04։50-ի սահմաններում։ Դեպքի վայր ժամանած մարտական հաշվարկը մարել է ավտոմեքենայում բռնկված կրակը, որից հետո միայն հայտնաբերվել են դիերը։

Դեպքի փաստով Վեդիի քննչական բաժնում արդեն իսկ նախաձեռնվել է քրեական վարույթ։

Ինչպես հայտնում է shamshyan.com կայքը, իրավապահներն այժմ աշխատում են դեպքի վայրում՝ պարզելու համար ավտոմեքենայի սեփականատիրոջ, վարորդի, ինչպես նաև մահացածների ինքնությունը։ Նախնական տվյալներով՝ քննարկվում են պատահարի մի քանի վարկածներ, այդ թվում՝ հնարավոր վթարի հետևանքով առաջացած հրդեհը։