Բացահայտվել է ամիսներ առաջ տեղի ունեցած սպանությունը

Արագածոտնի մարզի Մելիքգյուղ համայնքում բացահայտվել է դաժան սպանություն․ 25 և 20 տարեկան եղբայրները կենցաղային վիճաբանության ժամանակ սպանել են 56-ամյա մորը, իսկ դին թաքցրել կիսակառույց շինության հողաշերտի տակ։

ՀՀ ՆԳՆ ոստիկանության փոխանցմամբ՝ հուլիսի 22-ին Արագածոտնի մարզային վարչությունում հաղորդում էր ստացվել 1970 թ․ ծնված Ռ․ Մ․-ի անհետ կորելու մասին։

Օպերատիվ-հետախուզական միջոցառումների արդյունքում քրեական ոստիկանները փաստական տվյալներ են ձեռք բերել, որ դեռևս սույն թվականի մարտ ամսին տանը ծագած վիճաբանության ընթացքում որդիները գրտնակի հարվածով սպանել են մորը։ Հանցագործության հետքերը թաքցնելու նպատակով նրանք դիակը տեղափոխել են հարևանությամբ գտնվող կիսակառույց շինություն և թաղել հողի տակ։

Հուլիսի 22-ին եղբայրները հայտնաբերվել և ձերբակալվել են։ Ոստիկանությունում նրանցից մեկը տվել է խոստովանական ցուցմունք։ Երիտասարդների մատնանշած վայրում կատարված պեղումների արդյունքում հայտնաբերվել է 56-ամյա կնոջ դին։

Ձերբակալված երիտասարդներն ու կազմված փաստաթղթերը փոխանցվել են նախաքննական մարմնին։ Նրանք տեղափոխվել են ձերբակալվածների պահման վայր (ՁՊՎ)։ Դեպքի առթիվ նախաձեռնված քրեական վարույթի շրջանակներում նախաքննությունը շարունակվում է։