Բլոգեր Արամ Ավետիսյանի մասնակցությամբ միջադեպով ձերբակալված քաղաքացին ազատ է արձակվել. ՔԿ

 Արարատի մարզ բլոգեր Արամ Ավետիսյանի այցելության և քաղաքացու հետ տեղի ունեցած միջադեպի առթիվ քրեական վարույթ է նախաձեռնվել: Այս մասին հայտնել են ՀՀ քննչական կոմիտեից։

Վարույթը նախաձեռնվել է ՆԳՆ-ից ստացված հաղորդման հիման վրա՝ խուլիգանության հատկանիշներով։ Դրա շրջանակում ձերբակալվել էր «Ծիածանի շուկա»-ի վաճառողը, որի հետ վեճի էր բռնվել բլոգերը։

Քննչական կոմիտեից չեն հայտնել՝ արդյոք Արամ Ավետիսյանը հարցաքննվել է, թեոչ, սակայն Armpulse.am-ին ՔԿ-ից փոխանցել են, որ ձերբակալված անձն արդեն ազատ է արձակվել:

Հիշեցնենք, որ օրեր առաջ Արամ Ավետիսյանն այցելել էր Արարատի մարզի մեծածախ «Ծիածանի շուկա»։ Իրավիճակը լարվել էր այն պահին, երբ վաճառողներից մեկը, դիմելով նկարահանող խմբին, հարցրել էր՝ արդյո՞ք «դավաճանների լրատվականն» են։ Դրանից հետո տեղի էր ունեցել լեզվակռիվ, հնչել էին փոխադարձ վիրավորանքներ ու հայհոյանքներ, ինչպես նաև սպառնալիքներ՝ խուլիգանության համար պատասխանատվության ենթարկելու վերաբերյալ։