Էջմիածնում ոստիկանները կանխել են սառը զենքերի կիրառմամբ զինված հաշվեհարդարը

Էջմիածին քաղաքում ոստիկանության ծառայողների օպերատիվ գործողությունների շնորհիվ կանխվել է սառը զենքերի կիրառմամբ նախապատրաստվող հաշվեհարդար։ Այս մասին հայտնում է Shamshyan.com-ը։

Ըստ աղբյուրի՝ միջադեպի նախապատմությունը սկսվել է օգոստոսի 1-ին Սոս Մանուկյան փողոցում, որտեղ կենցաղային հողի վրա վիճաբանություն է տեղի ունեցել 18-ամյա Արթուր Գ․-ի և 23-ամյա երկվորյակ եղբայրներ Արման ու Ավետիս Պ․-երի, ինչպես նաև նրանց 57-ամյա հոր՝ Աշոտ Պ․-ի միջև։ Ոստիկանության տվյալներով՝ վերջիններս քաշքշել և հարվածներ են հասցրել 18-ամյա երիտասարդին։

Դեպքից երկու օր անց Արթուր Գ․-ն, ընկերների հետ նույն փողոցում հավաքվելով, զինվել է տարբեր տեսակի սառը զենքերով։ Իրավապահների օպերատիվ տվյալների համաձայն՝ խումբը սպասել է, որպեսզի եղբայրները փակեն իրենց տան հարակից մրգի խանութը, որից հետո ծրագրել է հանկարծակի հարձակվել և հաշվեհարդար տեսնել նրանց հետ։

Ոստիկանության աշխատակիցները, իրացնելով ստացված տեղեկությունները, խուլիգանության նախապատրաստման և ապօրինի սառը զենք կրելու հիմնավոր կասկածանքով բերման են ենթարկել Արթուր Գ․-ին և խմբի մյուս մասնակիցներին, որոնց թվում եղել են նաև անչափահասներ։ Հաջորդ օրը ոստիկանություն են տեղափոխվել և ձերբակալվել նաև Արման և Ավետիս Պ․-երը։

Իրավապահների հայտնվելու պահին կասկածյալներից երկուսը փորձել են ազատվել սառը զենքերից․ դեպքի վայրի զննությամբ հայտնաբերվել է մեկ կռփազենք (կաստետ) և գաղտնի փականով դանակ։

Դեպքի առթիվ կազմված նյութերն ու փաստաթղթերը փոխանցվել են ՀՀ քննչական կոմիտեի Արմավիրի մարզային քննչական վարչության Վաղարշապատի քննչական բաժին։