ԵԽԽՎ-ն բանաձև է ընդունել․ պահանջում են դադարեցնել Վրաստանում ընդդիմության արգելման գործընթացը

Եվրոպայի խորհրդի խորհրդարանական վեհաժողովը (ԵԽԽՎ) հունիսի 24-ին բանաձև է ընդունել Վրաստանի վերաբերյալ՝ խորը մտահոգություն հայտնելով երկրում ժողովրդավարության հետընթացի, քաղաքական բռնաճնշումների և խորը ինստիտուցիոնալ ճգնաժամի կապակցությամբ։

Բանաձևը վերնագրված է «Ժողովրդավարական հաստատությունների գործունեությունը Վրաստանում» և հիմնված է Վրաստանում տիրող իրավիճակի մոնիտորինգի համազեկուցողների եզրակացությունների վրա։ Փաստաթղթում վերահաստատվում են նախկին գնահատականները և նշվում, որ Վրաստանում քաղաքացիական հասարակության, ընդդիմության և քննադատական ձայների նկատմամբ ճնշումները շարունակվում են։

ԵԽԽՎ-ն պահանջում է Վրաստանի իշխանություններից դադարեցնել ընդդիմության հետապնդումը և չեղարկել ռեպրեսիվ օրենքները։