«ԵՄ-ի և Ադրբեջանի միջև ակտիվ երկխոսություն է ընթանում, իսկ Հայաստանի հետ խաղաղությունն արդեն փաստացի ձեռք է բերվել․ Ալիև

Այսօր Եվրոպական միության և Ադրբեջանի միջև դիտվում է շատ ակտիվ ու դինամիկ երկխոսություն։ Ինչպես հայտնում են ադրբեջանական ԶԼՄ–ները, այս մասին հայտարարել է Ադրբեջանի նախագահ Իլհամ Ալիևը՝ Եվրահանձնաժողովի նախագահ Ուրսուլա ֆոն դեր Լայենի հետ մամուլի համար արված համատեղ հայտարարության ընթացքում։

Ալիևը տեղեկացրել է, որ Ուրսուլա ֆոն դեր Լայենի հետ հանդիպմանը քննարկվել է նաև Ադրբեջանի եվ Հայաստանի միջև հարաբերությունների կարգավորման գործընթացը։ Նրա պնդմամբ՝ այդ գործընթացը հաջողությամբ առաջ է ընթանում։

Ադրբեջանի նախագահը նշել է, թե փաստացիորեն խաղաղությունն արդեն ձեռք է բերվել.

«Մենք միակողմանի քայլեր ենք ձեռնարկել՝ ցույց տալու համար, որ սա թղթի վրա գրված խաղաղություն չէ։ Մեկ բառով՝ մենք ցուցադրում ենք, որ մեզ համար խաղաղությունն իրականություն է»,- ասել է Ալիևը։

Ադրբեջանի նախագահը հանդիպում է ունեցել պաշտոնական պատվիրակության հետ։ Իլհամ Ալիևն ընդգծել է, որ տրանսպորտային և լոգիստիկ ոլորտներում Ադրբեջանի ու Թուրքմենստանի միջև համագործակցությունը կրում է երկարաժամկետ բնույթ։ Ադրբեջանում հաստատվել են օդանավակայանների կառավարման նոր կանոնները։