Ֆրանսիայում արգելել են մինչև 15 տարեկան երեխաներին օգտվել սոցցանցերից

Ֆրանսիան դարձել է Եվրոպայում առաջին երկիրը, որը պաշտոնապես 15 տարեկանից ցածր անձանց համար արգելել է սոցիալական ցանցերի օգտագործումը։ Երկրի խորհրդարանն ընդունել է սոցիալական հարթակների հասանելիությունը սահմանափակող օրինագիծը, հայտնում է BFMTV հեռուստաալիքը։

Փաստաթղթի օգտին քվեարկել է 279 պատգամավոր, դեմ՝ 81-ը։

Օրենքը սոցիալական ցանցերին պարտավորեցնում է ստուգել օգտատերերի տարիքը, սակայն տարիքային ստուգման մեխանիզմները օրենքի տեքստում հստակեցված չեն։ Բացի այդ, նախատեսվում է նաև ավագ դպրոցի աշակերտների կողմից դպրոցներում բջջային հեռախոսների օգտագործման արգելք։ Ֆրանսիայի կառավարությունը նախատեսում է սահմանափակումները ներդնել երկու փուլով։ Սեպտեմբերի 1-ից նոր ստեղծվող օգտահաշիվները պետք է անցնեն տարիքային ստուգում, իսկ արդեն գոյություն ունեցող հաշիվների նկատմամբ նոր կանոնները կսկսեն կիրառվել 2027 թվականի հունվարի 1-ից։