Գերմանական հայտնի պարբերականը գրել է Ադրբեջանում մարդու իրավունքների աղետալի վիճակի մասին

Գերմանական աշխարհահռչակ «Frankfurter Allgemeine Zeitung» թերթը, Եվրահանձնաժողովի նախագահ Ուրսուլա ֆոն դեր Լայենի՝ Բաքու կատարելիք այցի նախաշեմին, հոդված է հրապարակել, որտեղ անդրադարձել է Ադրբեջանում մարդու իրավունքների խնդրին, այդ թվում Ադրբեջանի ժողովրդական ճակատ կուսակցության առաջնորդ Ալի Քերիմլիի ՝ կալանքի տակ գտնվելու փաստին։

«Այս չորեքշաբթի Եվրահանձնաժողովի նախագահ Ուրսուլա ֆոն դեր Լայենի՝ Ադրբեջան կատարելիք այցի նախաշեմին, բռնապետ Ալիևի ռեժիմի քաղբանտարկյալները բարձրացնում են իրենց ձայնը՝ պահանջելով նրանից էներգետիկ, առևտրային և ենթակառուցվածքային հարցերից բացի քննարկել նաև երկրում տիրող մարդու իրավունքների աղետալի վիճակը»,-ասվում է հոդվածում։

Թերթը նշում է, որ Ալիևի ռեժիմը երկար ժամանակ է՝ ոգևորված է Ուկրաինայի դեմ Ռուսաստանի պատերազմի ֆոնին Ադրբեջանի հետ գործընկերության հանդեպ Եվրամիության հետաքրքրության մեծացմամբ։

Քերիմլին 2025 թ․ նոյեմբերից պահվում է Ալիևի հատուկ ծառայությունների քննչական մեկուսարանում։ Մարդու իրավունքների պաշտպանները նրան առաջադրված «պետական հեղաշրջման» մեղադրանքները համարում են շինծու։ Քերիմլին Արևմուտքի առաջնորդներին կոչ է անում ոչ մի զիջում չանել բռնապետին․ «Եթե ստիպված եք, ապա համագործակցեք նրանց հետ էներգետիկայի և անվտանգության ոլորտներում, բայց մի՛ մոռացեք այդ երկրների ժողովուրդներին։ Հարցրե՛ք ոտնահարված իրավունքների մասին և պատժամիջոցնե՛ր կիրառեք այն պաշտոնատար անձանց նկատմամբ, ովքեր բացահայտորեն խախտում են օրենքն ու մարդու իրավունքները»։