Գևորգ Պապոյանն ու Անտոն Ալիխանովը քննարկել են հայ-ռուսական առևտրատնտեսական կապերի զարգացումը

Հայաստանի Հանրապետության էկոնոմիկայի նախարար Գևորգ Պապոյանը Ռուսաստանի Դաշնություն կատարած աշխատանքային այցի շրջանակում հանդիպել է ՌԴ արդյունաբերության և առևտրի նախարար Անտոն Ալիխանովի հետ։ Այս մասին տեղեկացնում է ՀՀ էկոնոմիկայի նախարարության մամուլի ծառայությունը։

Հանդիպման ընթացքում երկու երկրների գերատեսչությունների ղեկավարները քննարկել են հայ-ռուսական առևտրատնտեսական հարաբերությունների ընթացիկ զարգացումներն ու դինամիկան։ Հատուկ անդրադարձ է կատարվել արդյունաբերական կապերի ընդլայնման հնարավորություններին և երկկողմ ներդրումային ծրագրերի խթանմանն ուղղված քայլերին։

Ըստ պաշտոնական հաղորդագրության՝ կողմերը մտքեր են փոխանակել նաև փոխադարձ հետաքրքրություն ներկայացնող մի շարք այլ հարցերի շուրջ։

Հանդիպման արդյունքներով Գևորգ Պապոյանն ու Անտոն Ալիխանովը վերահաստատել են իրենց պատրաստակամությունը՝ շարունակելու ակտիվ ու կառուցողական երկխոսությունը։ Այն միտված է լինելու երկկողմ առևտրատնտեսական կապերի ամրապնդմանը և արդյունաբերական ոլորտում փոխգործակցության հետագա խորացմանը։