Գուգարքում զորավարժության ժամանակ զինծառայող է տուժել. ՊՆ խոսնակ

Գուգարք գյուղում տեղի ունեցած զորավարժությունների ժամանակ հատուկ նշանակության բրիգադի զինծառայող է վիրավորվել:

Ըստ մամուլում շրջանառվող լուրերի՝ դեպքը տեղի է ունեցել հունիսի 18-ին կամ 19-ին՝ հակահետևակային ականի պայթյունի հետևանքով, ինչի պատճառով վնասվել է զինծառայողի ոտքը։

Armpulse-ի հետ զրույցում ՀՀ Պաշտպանության նախարարության մամուլի քարտուղար Արամ Թորոսյանը հաստատեց այս տեղեկությունը։ 

«Զինծառայողը վիրահատվել է, գտնվում է բժիշկների հսկողության ներքո, նրա կյանքին վտանգ չի սպառնում։ Առողջության և զինծառայողի այլ անձնական տվյալներ չենք կարող հաղորդել, քանի որ համապատասխան օրենքները (անձնական տվյալների և բժշկական գաղտնիքի մասին) թույլ չեն տալիս»,– փոխանցել է Թորոսյանը։

Այս պահին դեպքի այլ մանրամասներ կամ միջադեպի հանգամանքների վերաբերյալ պաշտոնական այլ տեղեկություններ չեն հաղորդվում։