Հալաբյան փողոցից՝ «ՍԱՍ» սուպերմարկետի մոտից, թիվ 8 երթուղին սպասարկող ավտոբուսի վարորդը տեղափոխվել է հիվանդանոց

Երեկ՝ ապրիլի 20-ին, դանակահարություն է տեղի ունեցել Երևանում։ Ժամը 22:20-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Մաշտոցի բաժնում օպերատիվ տեղեկություններ են ստացվել, որ Հալաբյան փողոցից դանակահարված քաղաքացի է Երևանի 103 շտապօգնության հերթապահ խմբի կողմից տեղափոխվել «Արմենիա» բժշկական կենտրոն, այս մասին հայտնում է Shamshyan.com–ը։

Ինչպես դեպքի վայրից հայտնում է ֆոտոլրագրող Գագիկ Շամշյանը, հիվանդանոց են մեկնել ոստիկանության Մաշտոցի բաժնի օպերատիվ խումբը՝ բաժնի պետ Դավիթ Ավագյանի և նրա տեղակալ Գևորգ Պողոսյանի գլխավորությամբ։

Բժիշկները ոստիկաններին հայտնել են, որ վիրավորը գտնվում է վիրահատարանում և ի վիճակի չէ կատարվածի վերաբերյալ բացատրություն տալ։

Մինչ բժիշկները անհրաժեշտ բուժօգնություն էին ցուցաբերում, ոստիկանները պարզել են տուժածի ինքնությունը։ Նա Կոտայքի մարզի բնակիչ 44-ամյա Արսեն Դ․-ն է, որը դանակահարվել է Հալաբյան փողոցում՝ «ՍԱՍ» սուպերմարկետի հարակից տարածքում։

Դեպքի մասին ոստիկանության Մաշտոցի բաժնից տեղեկությունը փոխանցվել է ՀՀ Քննչական կոմիտե, որտեղ՝ Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում, նախաձեռնվել է քրեական վարույթ։

Ըստ Շամշյանի տեղեկությունների՝ վիրավորը աշխատում է«Երևան ավտոբուս» ՓԲԸ-ում և հանդիսանում է թիվ 8 երթուղին սպասարկող ավտոբուսի վարորդ։

Դեպքի հանգամանքները պարզվում են։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։