Համայնքային ոստիկանները ապօրինի շրջանառությունից դուրս են բերել 16 կգ թմրամիջոց

Համայնքային ոստիկանության Շենգավիթի և Մալաթիայի բաժինների ծառայողները համատեղ ձեռնարկած օպերատիվ-հետախուզական միջոցառումների արդյունքում սեպտեմբերի 1-ին Գագարինի փողոցում հայտնաբերել, թմրամիջոց ձեռք բերելու, պահելու և իրացնելու կասկածանքով ձերբակալել և Մալաթիայի բաժին են տեղափոխել 34-ամյա օտարերկրյա քաղաքացու։

Բացատրական աշխատանքի արդյունքում նա հայտնել է, որ Գագարինի փողոցի առանձնատներից մեկի սենյակը կահավորել է որպես ջերմատնակ, որտեղ թմրամիջոց պատրաստելու և իրացնելու նպատակով կանեփ է աճեցնում։

Նույն օրը նշված տան մոտ հայտնաբերվել, թմրամիջոց ձեռք բերելու, պահելու և իրացնելու կասկածանքով ձերբակալվել և Մալաթիայի բաժին է տեղափոխվել նաև 40-ամյա օտարերկրյա քաղաքացի։
34-ամյա և 40-ամյա տղամարդիկ կազմված փաստաթղթերի հետ ներկայացվել են նախաքննական մարմին։

Նախաձեռնվել է քրեական վարույթ, որի շրջանակում Գագարինի փողոցի նշված տանը կատարված խուզարկությամբ հայտնաբերվել են մարիխուանայի նմանվող՝ ընդհանուր 16 կիլոգրամից ավելի զանգվածով ապակե 26 տարա, 34,4 գրամ կանեփի սերմ, կանեփի չորացված զանգված, ծաղկամաններում աճեցված կանեփի բույսեր, դրանց մշակման համար նախատեսված նյութեր և այլ իրեր։

Կատարվում է նախաքննություն։