Հանցավորությունը նվազել է 3,2 տոկոսով, իսկ աճի մասին պնդումները մանիպուլյատիվ են․ ՆԳՆ խոսնակ

ՆԳՆ խոսնակ Նարեկ Սարգսյանը արձագանքել է հանցավորության աճի վերաբերյալ հրապարակումներին՝ դրանք որակելով մանիպուլյատիվ, այս մասին նա հայտնում է իր ֆեյսբուքյան էջում։

Սարգսյանի խոսքով՝ 2021 թվականին ընդունված Քրեական դատավարության նոր օրենսգրքով հանցագործության վերաբերյալ յուրաքանչյուր հաղորդում արտացոլվում է վիճակագրության մեջ որպես առանձին դեպք, մինչդեռ նախկինում նման հաղորդումների մի մասը չէին ներառվում պաշտոնական տվյալներում։

Նա նաև նշել է, որ վերջին տարիներին որպես հանցագործություն են հաշվառվում մի շարք արարքներ, որոնք նախկինում համարվում էին վարչական իրավախախտումներ։ Որպես օրինակ՝ խոսնակը մատնանշել է վարելու իրավունք չունենալու հետ կապված շուրջ 10 հազար դեպքերը, որոնք 2025 թվականին ներառվել են հանցագործությունների վիճակագրության մեջ։

ՆԳՆ խոսնակի պնդմամբ՝ այս հանգամանքների պատճառով 2018 և 2025 թվականների տվյալների ուղիղ համեմատությունը սխալ պատկեր կարող է ստեղծել, մինչդեռ պաշտոնական տվյալներով հանցավորությունը նվազել է 3,2 տոկոսով։