Հարություն Քնարյանի հաղորդումը Հովիկ Աբրահամյանի դեմ․ խոշոր վարկ, դրամական վնաս և ներմուծումից հրաժարվելու փորձ

ArmPulse-ի տեղեկությունների համաձայն՝ շաքարավազ ներմուծող գործարար Հարություն Քնարյանը սեպտեմբերի 7-ին իրավապահ մարմիններին հաղորդում է ներկայացրել ՀՀ նախկին վարչապետ Հովիկ Աբրահամյանի դեմ՝ շաքարավազ ներմուծող ընկերությունը, ըստ հաղորդման, չարամտորեն սնանկության տանելու վերաբերյալ։

Մասնավորապես, ըստ մեզ հասած տեղեկությունների՝ Քնարյանը հաղորդման մեջ պնդում է, որ Հովիկ Աբրահամյանը, չարաշահելով շաքարավազ ներմուծող ընկերության վստահությունը, իր նախաձեռնությամբ ընկերության անունով խոշոր վարկ է ներգրավել, իսկ հետագայում վարկային միջոցներից գումարներ, ըստ հաղորդման, մաս-մաս դուրս է բերել ընկերությունից։

Քնարյանի պնդմամբ՝ այդ գործողությունների հետևանքով ընկերությունը հայտնվել է ծանր ֆինանսական վիճակում, հասել սնանկության և ներկայումս չի կարողանում սպասարկել վարկային պարտավորությունները, որոնք շարունակում են մնալ ընկերության վրա։

Հաղորդման մեջ Քնարյանը նշել է նաև, որ իրեն պատճառվել է խոշոր չափերի դրամական վնաս, ինչպես նաև իր նկատմամբ փորձ է արվել կիրառել այնպիսի ուժեր կամ ազդեցություն, որոնց արդյունքում ինքը կհրաժարվեր շաքարավազի ներմուծումից։