Իրան ուղարկված օգնությունը Հայաստանի սեփական նախաձեռնությունն էր - դեսպան

Հայաստանի՝ Իրանին ուղարկած հումանիտար օգնությունը Երևանի ինքնուրույն նախաձեռնությունն էր։ Այս մասին Sputnik Արմենիային տված  հարցազրույցում ասել է Հայաստանում Իրանի Իսլամական Հանրապետության դեսպան Խալիլ Շիրղոլամին։ «Սա բարեկամական պետության կողմից բարի կամքի դրսևորում էր»,- ասել է դիվանագետը՝ գնահատելով Հայաստանի քայլը։ 

Դեսպանը նշել է, որ Իրանում իրավիճակը կայուն է և բնակչությունը լիովին ապահովված է առաջին անհրաժեշտության բոլոր ապրանքներով։ Ոչ դեֆիցիտ կա, ոչ էլ խուճապ։

Շիրղոլամինը միաժամանակ բարձր է գնահատել հայ հասարակության արձագանքը։ Նրա խոսքով՝ վերջին օրերին շատ հայեր պատրաստակամություն են հայտնել՝ նյութական օգնություն ցուցաբերելու, իսկ որոշները նույնիսկ առաջարկել են հատուկ հաշվեհամար բացել։ Իրանական կողմը ստեղծել է պարզեցված մեխանիզմ՝ օգնությունը արագ ուղարկելու համար։

Մարտի 23-ին արտաքին գործերի նախարար Արարատ Միրզոյանը հայտնել էր, որ Հայաստանը տարածաշրջանում սկսված ռազմական գործողություններից ի վեր առաջին անգամ է հումանիտար օգնություն ուղարկել Իրան՝ հիմնականում դեղորայքի տեսքով։