ՀՀ Էկոնոմիկայի նախարարի տեղակալն այցելել է խեցգետնաբուծարան

ՀՀ Էկոնոմիկայի նախարարի տեղակալ Տաթևիկ Սարգսյանն  այցելել է «ԵԵՎՆ» ՍՊ ընկերության նոր կառուցվող խեցգետնաբուծարան։ Այս մասին հայտնում են ՀՀ Էկոնոմիկայի նախարարությունից։

Ընկերությունն օգտվել է Էկոնոմիկայի նախարարության կողմից իրականացվող «Հայաստանի Հանրապետությունում արդյունաբերական խեցգետնաբուծության զարգացման 2024-2029 թվականների» ծրագրից։

Արարատի մարզի Ղուկասավան համայնքում ընկերությունը կառուցում է միջին հզորության խեցգետնաբուծական համալիր, որի տարեկան արտադրությունը կազմելու է 12 տոննա, ներդրվող գումարը կազմում է 129 900 000 ՀՀ դրամ, իսկ փոխհատուցման գումարը՝ 64 950 000 ՀՀ դրամ։

Այցի ընթացքում Տաթևիկ Սարգսյանը ներկայացրել է պետական օժանդակության գործիքակազմը, որը միտված է ոլորտի կայուն զարգացմանը։ Ոլորտի զարգացման համար կարևորվել է պետություն-մասնավոր նմանօրինակ համագործակցությունը։