ՀՀ ֆինանսների փոխնախարարը մասնակցել է կենսաբազմազանության ֆինանսավորման տարածաշրջանային երկխոսությանը

ՀՀ ֆինանսների նախարարի տեղակալ Էդգար Մկրտչյանը մասնակցել է Եվրոպայի, Ասիայի և Խաղաղօվկիանոսյան տարածաշրջանի «Կենսաբազմազանության ֆինանսավորման 12-րդ տարածաշրջանային երկխոսություն» աշխատաժողովին, որը կազմակերպվել է ՄԱԿ-ի Զարգացման ծրագրի (ՄԱԶԾ) Կենսաբազմազանության ֆինանսավորման նախաձեռնության (BIOFIN) շրջանակում, այս մասին հայտնում է ՀՀ Ֆինանսների նախարարությունը։

Բացման խոսքում Էդգար Մկրտչյանը նշել է, որ տարածաշրջանային երկխոսությունն անցկացվում է Հայաստանի համար կարևոր ժամանակահատվածում՝ հաշվի առնելով, որ այս տարվա հոկտեմբերին Երևանը կհյուրընկալի ՄԱԿ-ի Կենսաբազմազանության մասին կոնվենցիայի Կողմերի 17-րդ համաժողովը (COP17)։

Նա ընդգծել է, որ կենսաբազմազանության ֆինանսավորումը և համապատասխան պայմանների ձևավորումը COP17-ի հայաստանյան նախագահության առանցքային առաջնահերթություններից են՝ Կունմինգ-Մոնրեալի գլոբալ կենսաբազմազանության շրջանակի նպատակների առաջմղման համատեքստում։