ՀՀ ՆԳՆ ոստիկանության կողմից բացահայտվել է Երևանում հավաքին մասնակցելու համար քաղաքացիներին վճարելու դեպք

Համայնքային ոստիկանության Արթիկի բաժնում ստացված օպերատիվ տեղեկությունը Քրեական ոստիկանության Շիրակի մարզային վարչության գործընկերների հետ իրացնելիս ապրիլի 23-ին պարզվեց, որ Փոքր Մանթաշ գյուղի բնակիչ 39-ամյա մի տղամարդ, նախնական պայմանավորվածությամբ, ապրիլի 11-ին Երևանի Ազատության հրապարակում կուսակցություններից մեկի կազմակերպած հավաքին մասնակցելու համար նյութապես շահագրգռել է համագյուղացիներից 12 հոգու, այդ թվում` անչափահասների` խոստանալով գումար, այս մասին հայտնում է ՀՀ ՆԳՆ ոստիկանությունը: Այս հարցում 39-ամյա տղամարդուն օժանդակել են ընտանիքի անդամները:

Ըստ ստացված տվյալների՝ Շիրակի մարզի Փոքր Մանթաշ գյուղի 39-ամյա բնակիչը նախնական պայմանավորվածությամբ ապրիլի 11-ին Երևանի Ազատության հրապարակում անցկացված հավաքին մասնակցելու նպատակով նյութապես շահագրգռել է համագյուղացիներից 12 անձի, որոնց թվում եղել են նաև անչափահասներ։ Նրանց խոստացվել է դրամական փոխհատուցում։

Պարզվել է, որ նշված անձը ընտանիքի անդամների աջակցությամբ կազմակերպել է գյուղացիների տեղափոխումը Երևան՝ երկու համագյուղացիների ավտոմեքենաներով։ Հավաքին մասնակցելուց հետո, վերադառնալով գյուղ, նա իր տան բակում չափահասներին վճարել է 10 հազար դրամ, իսկ անչափահասներին՝ 5 հազար դրամ՝ միաժամանակ խոստանալով հետագա ֆինանսական աջակցություն։

Դեպքի առթիվ 12 անձանցից ընդունվել են նույնաբովանդակ հաղորդումներ, որոնք փոխանցվել են նախաքննական մարմին։

Նշված փաստի հիման վրա ընտանիքի չորս անդամների նկատմամբ հարուցվել է հանրային քրեական հետապնդում՝ Քրեական օրենսգրքի 236-րդ հոդվածի 2-րդ մասով՝ հավաքին մասնակցելու նպատակով նյութապես շահագրգռելու հատկանիշներով։

Որպես խափանման միջոց՝ 39-ամյա տղամարդու նկատմամբ կիրառվել է տնային կալանք և բացակայելու արգելք։ Նրա մոր և քրոջ նկատմամբ սահմանվել է վարչական հսկողություն և բացակայելու արգելք, իսկ ընտանիքի անչափահաս անդամի նկատմամբ՝ դաստիարակչական հսկողություն։

Նախաքննությունը շարունակվում է։