Հուլիսի 6-ից քաղաքացիները կարող են դիմել վարելու իրավունքի վերականգնման համար․ ՆԳ նախարար

ՀՀ կառավարության հուլիսի 2-ի նիստում ներքին գործերի նախարար Արփինե Սարգսյանը ներկայացրել է վարորդական վկայական ստանալու քննությունների ընդունման և տրամադրման կարգում փոփոխությունների նախագիծը։ Նախարարի խոսքով՝ լուծումները ձևավորվել են քաղաքացիների հետ ակտիվ երկխոսության արդյունքում։

Նախագծով առաջարկվում է երեք հիմնական փոփոխություն, որոնք ուժի մեջ կմտնեն սեպտեմբերի 1-ից.

• Գործող կարգավորումներով բժշկական հաստատությունների հետ բավարար փոխգործակցություն չի եղել, ինչի հետևանքով երբեմն վարորդական իրավունք է տրամադրվել թմրաբանական կամ հոգեբուժական հաստատություններում հաշվառված անձանց։ Նոր փոփոխությամբ տվյալները կստացվեն ինքնաշխատ եղանակով։ Ավելին՝ համակարգից ստացված բացասական ազդակը հիմք կհանդիսանա վարելու իրավունքի դադարեցման համար, նույնիսկ եթե քաղաքացին չի ներկայացել հաշվառման-քննական ստորաբաժանում։

• Հերթերի ծանրաբեռնվածության պատճառով գործող 1 տարի ժամկետը հաճախ չէր բավարարում քաղաքացիներին գործնական քննությանը պատշաճ պատրաստվելու համար։ Այսուհետ տեսական քննության դրական արդյունքը կպահպանվի 2 տարի։

• Տեսական քննության հարցաշարերը կլինեն ավելի նպատակային։ Օրինակ՝ թեթև մարդատար մեքենայի քննության ժամանակ այլևս չեն ներառվի ավտոբուսների վարմանն առնչվող հարցեր, այլ կլինեն միայն տվյալ կարգին ու ենթակարգին բնորոշ հարցեր։

Նիստում ներկայացվել են նաև վարորդական իրավունքից զրկված անձանց վարելու իրավունքի վերականգնման նոր ընթացակարգերը։ Օրենսդրական այս փոփոխություններն ուժի մեջ կմտնեն հուլիսի 6-ից։

Վարչապետ Նիկոլ Փաշինյանը շեշտել է, որ նոր կարգավորումները վերաբերում են միայն վարչական կարգով զրկման դեպքերին և չեն տարածվելու օրինական ուժի մեջ մտած դատավճռով իրավունքից զրկվածների վրա։

«Ակնհայտ է, որ մենք պետք է ճանապարհային երթևեկության անվտանգությանն ավելի ու ավելի մեծ ուշադրություն դարձնենք և ունենանք սկզբունքային դիրքորոշում, որովհետև խոսքը մարդկանց կյանքերի մասին է»,- նշել է վարչապետը՝ հանձնարարելով ապահովել հանրության պատշաճ իրազեկումը։