Հունիսի 1–25–ը Հայաստանից արտահանվել է 2 320 տոննա պտուղ–բանջարեղեն. Պապոյան

2026 թվականի հունիսի 1-ից 25-ն ընկած ժամանակահատվածում Հայաստանից արտահանվել է 2 320 տոննա պտուղ-բանջարեղեն։ Այս մասին այսօր ՀՀ կառավարության նիստի ժամանակ տեղեկացրեց էկոնոմիկայի նախարար Գևորգ Պապոյանը։

Նախարարը ներկայացրեց արտահանված մշակաբույսերի հիմնական ցուցանիշները.

• Ծիրան՝ 1071 տոննա (որի 90 տոկոսն արտահանվել է վերջին մեկ շաբաթվա ընթացքում),

• Կեռաս՝ 882 տոննա (որի բերքահավաքն արդեն իսկ ավարտվում է),

• Լոլիկ՝ 140 տոննա,

• Թութ, թուզ, հաղարջ, մոշ՝ 100 տոննա,

• Ազնվամորի, ելակ՝ 87 տոննա,

• Խնձոր՝ 40 տոննա։

Գևորգ Պապոյանի խոսքով՝ ներքին շուկայում այս փուլում նկատելի գնանկում կա միայն երկու ուղղություններով.

«Մեր շուկայում տեսանելի գնանկում կա 2 ուղղություններով՝ ծաղիկի և լոլիկի։ Մնացած ուղղություններով առանձնահատուկ գնանկում չի նկատվում, և առկա բերքը կա՛մ ամբողջությամբ վաճառվում է շուկայում, կա՛մ արտահանվում է»,- հայտարարեց նախարարը։

Էկոնոմիկայի նախարարը հավելեց նաև, որ հայկական թարմ պտուղ-բանջարեղենի արտահանման աշխարհագրությունն այս տարի բավականին մեծ է։ Հիմնական ուղղությունների թվում են՝ Իրաքը, ԱՄԷ-ն, Հունաստանը, Չեխիան, Ուկրաինան, Լեհաստանը և Թուրքիան։