Ինչպես պետք է կատարվի նախադպրոցական ուսումնական հաստատություններում երեխաների սննդի կազմակերպումը

Մանկապարտեզների սննդաբլոկները հայտնվել են Սննդամթերքի անվտանգության տեսչական մարմնի (ՍԱՏՄ) խիստ հսկողության ներքո։ Ոլորտում գործում են նոր և անզիջում կանոններ՝ սկսած առողջապահության նախարարի նորմատիվներից մինչև Մաքսային միության տեխնիկական կանոնակարգեր։

Ամենակարևոր փոփոխություններից մեկը վերաբերում է մսամթերքին։ Նախադպրոցական հաստատություններում սնունդ պատրաստելու համար օգտագործվող միսը պետք է լինի բացառապես սպանդանոցային ծագման (պարտադիր «Թիվ 5» վկայականով) և մանկապարտեզ հասնի միայն պաղեցված վիճակում։ Սառեցված մսի մուտքը խոհանոց արգելվում է։ Այս կետը տնօրենները պարտադիր պետք է ներառեն մատակարարների հետ կնքվող պայմանագրերում։գ

Մանկապարտեզների խոհանոցներում այսուհետ պետք է ներդրված լինեն վտանգի վերլուծության և հսկման կրիտիկական կետերի՝ HACCP (ՎՎՀԿԿ) համակարգի սկզբունքները։ Սա նշանակում է՝

• Աղտոտման ռիսկերի բացարձակ կանխարգելում,

• Ջերմային և սառնարանային ռեժիմների ամենօրյա մշտադիտարկում,

• Հետագծելիություն՝ յուրաքանչյուր մթերք պետք է ունենա ծագումն ու անվտանգությունը հավաստող փաստաթուղթ։

ՍԱՏՄ-ն հիշեցնում է՝ երեխաների սննդակարգը պետք է լինի բազմազան և համապատասխանի տարիքային խմբերին։ Սննդաբլոկների, պահեստների պատշաճ սանիտարական վիճակն ու աշխատակիցների անձնական հիգիենան այլևս քննարկման ենթակա չեն։

Մանկապարտեզների ղեկավարներն ու պատասխանատու անձինք պետք է անհապաղ վերանայեն սննդի կազմակերպման ողջ շղթան։ Օրենսդրական պահանջների խախտումը կհանգեցնի իրավական կոշտ հետևանքների, քանի որ խոսքը երեխաների առողջության ու անվտանգության մասին է։