Իրակլի Կոբախիձեն անդրադարձել է ԱՄՆ–ի հետ ռազմավարական գործընկերության հարաբերությունների վերականգնման մասին

Վրաստանի վարչապետ Իրակլի Կոբախիձեն կրկին անդրադարձել է ԱՄՆ-ի հետ հարաբերությունների վերականգնման թեմային՝ նշելով, որ վերջին շրջանում տեղի ունեցած մի շարք հաղորդակցություններ հիմք են տալիս լավատեսության համար, որ կվերականգնվի Վրաստան–ԱՄՆ ռազմավարական գործընկերությունը։ Այս մասին հաղորդում է Վրաստանի Հանրային հեռուստաընկերությունը։

«Մենք պահպանում ենք այս լավատեսությունը և կրկին հայտնում մեր պատրաստակամությունն ամեն ինչ սկսել մաքուր էջից և կոնկետ ճանապարհային գծով։ Դրանից առաջ կար ռազմավարական գործընկերություն, չնայած այն ամբողջությամբ թղթի վրա էր։ Մենք ռազմավարական գործընկերներ էինք թղթի վրա, չկային որևէ կոնկրետ արդյունքներ, շոշափելի արդյունքներ՝ ոչ տնտեսության, ոչ առևտրի, ոչ էլ քաղաքականության առումով։ Ընդհակառակը, հենց այս ժամանակահատվածում, երբ մենք դեռ ունեինք ռազմավարական գործընկերություն, նախորդ վարչակազմը Վրաստանում հեղափոխություններ էր կազմակերպում»,- հայտարարել է Կոբախիձեն։

Վարչապետը նաև ընդգծել է, որ հարաբերությունների նոր փուլի մեկնարկի միակ իրական չափանիշը ռազմավարական գործընկերության վերականգնումն է։

«Սա միակ չափանիշն է, որը մենք կարող ենք ընդունել։ Սա չպետք է լինի ինչ-որ փաստաթղթի ստորագրում, սա պետք է լինի ռազմավարական գործընկերություն՝ իրական, շոշափելի արդյունքներով, մենք ամբողջությամբ կենտրոնացած ենք դրա վրա և մենք սա ասում ենք բացահայտ, հրապարակավ և մեր ամերիկացի գործընկերների հետ փակ դռների հետևում, որ մեզ համար միակ չափանիշը, որը վկայում է հարաբերությունների իրական վերագործարկման մասին, ռազմավարական գործընկերության վերականգնումն է, և մենք հույս ունենք, որ դա տեղի կունենա։ Մենք ամեն ինչ կանենք դրա համար»,- նշել է Կոբախիձեն։